കോഴിക്കോട്: ഓയിസ്‌കയുമായി ചേര്‍ന്ന് വിജിലന്‍സ് ആന്‍ഡ് ആന്റി കറപ്ഷന്‍ ബ്യൂറോ നടപ്പാക്കുന്ന 'വിജില്‍ ഫോര്‍ നാച്വര്‍' പദ്ധതിയുടെ ഔപചാരിക ഉദ്ഘാടനം ടൗണ്‍ഹാളില്‍ മേയര്‍ തോട്ടത്തില്‍ രവീന്ദ്രന്‍ നിര്‍വഹിച്ചു.
വിജിലന്‍സ് ഉത്തരമേഖലാ പൊലിസ് സൂപ്രണ്ട് ജോണ്‍സണ്‍ ജോസഫ് അധ്യക്ഷനായി. പ്രൊഫ. ശോഭീന്ദ്രന്‍ മുഖ്യപ്രഭാഷണം നടത്തി. ടി.കെ ബൈജുനാഥ് ശില്‍പശാലക്ക് നേതൃത്വം നല്‍കി.
ദിനാചരണത്തിന്റെ ഭാഗമായി മാനാഞ്ചിറ സ്‌ക്വയറില്‍ ജില്ലയിലെ വിവിധ കോളജുകളിലെ എന്‍.എസ്.എസ് യൂനിറ്റുകളുടെ പങ്കാളിത്തത്തോടെ നടത്തിയ പോസ്റ്റര്‍ പ്രദര്‍ശനം പോള്‍ കല്ലാനോട് ഉദ്ഘാടനം ചെയ്തു.
വിവിധ കോളജുകളിലെ വളണ്ടിയര്‍മാരുടെ അഴിമതി വിരുദ്ധ സന്ദേശങ്ങള്‍ ഉള്‍ക്കൊള്ളുന്ന നൃത്തശില്‍പം, സംഘഗാനം, ലഘുനാടകം എന്നിവ അരങ്ങേറി. മാനാഞ്ചിറ പരിസരത്തും ബീച്ചിലും ഫ്‌ളാഷ്‌മോബ് അവതരിപ്പിച്ചു.