വള്ളുവമ്പ്രം: അത്താണിക്കല്‍ ശിഹാബുല്‍ ഉലൂം മദ്‌റസ വിദ്യാര്‍ഥികളുടെ നബിദിനഘോഷയാത്രക്ക് വള്ളുവമ്പ്രം ഫ്രണ്ടസ് ക്ലബ് ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബിന്റെ നേതൃത്വത്തില്‍ മുസ്‌ലിയാര്‍ പീടികയില്‍ സ്വാമിമാരുടെ വക പായസവിതരണം നടത്തി. പായസവിതരണത്തിന് സ്വാമിമാരായ അത്തിക്കോട്ടില്‍ സുകുമാരന്‍, ചേലക്കോട്ട് കുട്ടന്‍, അത്തിക്കോട്ടില്‍ സുബ്രഹ്മണ്യന്‍, നെച്ചിയില്‍ സുകുമാരന്‍, അത്തിക്കോട്ടില്‍ സുഭാഷ്, നെച്ചിയില്‍ ഉണ്ണികൃഷ്ണന്‍, അത്തിക്കോട്ടില്‍ ശശികുമാര്‍, നെച്ചിയില്‍ ഷൈജു, അത്തിക്കോട്ടില്‍ ദീപക്, മൂലക്കോട്ടില്‍ സണ്ണി നേതൃത്വം നല്‍കി.

മഞ്ചേരിയില്‍ ഓട്ടോകള്‍ക്ക് ഹോളോഗ്രാമും ബാര്‍കോഡും ഉള്‍പ്പെടുത്തിയ സ്റ്റിക്കര്‍ വിതരണം ചെയ്തു

മഞ്ചേരി: നഗരത്തിലെ ഓട്ടോറിക്ഷകള്‍ക്ക് ട്രാഫിക്ക് പൊലിസ് മികച്ച സംവിധാനങ്ങളോടെയുള്ള പുതിയ സ്റ്റിക്കര്‍ പതിച്ചു നല്‍കി. ഹോളോഗ്രാമും ബാര്‍കോഡും ഉള്‍പ്പെടുത്തിയതാണ് പുതിയ സ്റ്റിക്കര്‍. പെര്‍മിറ്റില്ലാതെ അനധികൃതമായി സര്‍വീസ് നടത്തുന്നതുള്‍പ്പെടെ കുറ്റകൃത്യങ്ങള്‍ കുറച്ചുകൊണ്ടുവരാന്‍ പുതിയ സംവിധാനം വഴി സാധിക്കുമെന്നതിനാലാണ് ട്രാഫിക്ക് പൊലിസ് സ്റ്റിക്കര്‍ പുറത്തിറക്കിയത്.
ഇന്നലെ സ്റ്റിക്കര്‍ കൈപറ്റാത്തവര്‍ക്ക് 17ന് രാവിലെ പത്തിന് മഞ്ചേരി പൊലിസ് സ്റ്റേഷനിലെത്തി സ്റ്റിക്കര്‍ കൈപറ്റാവുന്നതാണ്. സ്റ്റിക്കര്‍ പതിക്കാത്ത ഓട്ടോകളെ 19നുശേഷം സര്‍വീസ് നടത്താന്‍ അനുവദിക്കുന്നതല്ലന്ന് ട്രാഫിക് എസ്.ഐ അറിയിച്ചു. പുതിയ സ്റ്റിക്കറിന്റെ വിതരണോദ്ഘാടനം മഞ്ചേരി മുനിസിപ്പല്‍ ടൗണ്‍ ഹാളില്‍ ചെയര്‍പേഴ്‌സണ്‍ വി.എം സുബൈദ നിര്‍വഹിച്ചു. എ.എസ്.ഐ പൗലോസ്, പ്രഭാകരന്‍, കോഡിനേഷന്‍ കമ്മിറ്റി ഭാരവാഹികളായ മുഹമ്മദ് പത്തിരിയാല്‍, നൗഷാദ് ആലങ്ങാടന്‍, പി രാജഗോപാല്‍, ഇ.പി ഗോപാലകൃഷ്ണന്‍, കെ ദേവദാസ്, മുജീബ് റഹ്മാന്‍ പത്തിരിയാല്‍ നേതൃത്വം നല്‍കി.