കൊച്ചി: കേരളത്തില്‍ അനുവദനീയമായ പരിധിയായ 50 മൈക്രോണില്‍ താഴെയുള്ള പ്ലാസ്റ്റിക് കാരി ബാഗുകള്‍ നിര്‍മിക്കുന്നില്ലെന്ന് ഉറപ്പുവരുത്താന്‍ ആത്മാര്‍ത്ഥമായി പരിശ്രമിക്കുന്നുണ്ടെന്ന് സംസ്ഥാന മലിനീകരണ നിയന്ത്രണ ബോര്‍ഡ് ഹൈക്കോടതിയില്‍ ബോധിപ്പിച്ചു. സംസ്ഥാനത്തെ പ്ലാസ്റ്റിക് മാലിന്യ സംസ്‌കരണത്തിന്റെ ഉത്തരവാദിത്വം തദ്ദേശ ഭരണ സ്ഥാപനങ്ങള്‍ക്കാണെന്നും ബോര്‍ഡ് കോടതിയെ അറിയിച്ചു. പ്ലാസ്റ്റിക് മാലിന്യം തുറസ്സായ സ്ഥലത്തു കത്തിക്കുന്നതു തടയാന്‍ നടപടി വേണമെന്നാവശ്യപ്പെട്ട് ആള്‍ കേരള റിവര്‍ പ്രൊട്ടക്ഷന്‍ കൗണ്‍സില്‍ നല്‍കിയ ഹരജിയിലാണ് ഇക്കാര്യം വ്യക്തമാക്കി മലിനീകരണ നിയന്ത്രണ ബോര്‍ഡ് എന്‍വയോണ്‍മെന്റല്‍ എന്‍ജിനീയര്‍ എസ്. ശ്രീകല സത്യവാങ്മൂലം നല്‍കിയത്.
1312 ടണ്‍ ഖരമാലിന്യമാണ് പ്രതിദിനം നഗരമേഖലകളില്‍ ഉല്‍പാദിപ്പിക്കപ്പെടുന്നത്. 50 മൈക്രോണില്‍ താഴെ കനമുള്ള പ്ലാസ്റ്റിക് കാരി ബാഗുകള്‍ നിരോധിച്ചിട്ടുണ്ട്. വലിച്ചെറിയുന്ന പ്ലാസ്റ്റിക് വസ്തുക്കള്‍ തുറസ്സായ സ്ഥലത്തു കത്തിക്കുന്നത് വിഷപ്പുക വമിക്കാന്‍ ഇടയാക്കും. ഇതു കര്‍ശനമായി തടയാന്‍ തദ്ദേശ ഭരണ സ്ഥാപനങ്ങള്‍ക്ക് നിര്‍ദേശം നല്‍കിയിട്ടുണ്ടെന്നും സത്യവാങ്മൂലത്തില്‍ പറയുന്നു.