വടക്കാഞ്ചേരി: പ്രത്യേക പരിഗണന അര്‍ഹിക്കുന്നവര്‍ക്ക് കൈത്താങ്ങാകാന്‍ വടക്കാഞ്ചേരി നഗരസഭ. ഓട്ടിസം, ശ്രദ്ധ കേന്ദ്രീകരിക്കാന്‍ പറ്റാത്ത അവസ്ഥ, സ്വഭാവ വൈകല്യങ്ങള്‍ തുടങ്ങിയ അവസ്ഥകള്‍ അനുഭവിക്കുന്ന കുട്ടികള്‍ക്കും അവരുടെ രക്ഷിതാക്കള്‍ക്കും ശാസ്ത്രീയമായ ചികിത്സാ രീതികള്‍ നല്‍കാനാണ് ശില്‍പശാല കൊണ്ട് ഉദ്ദേശിക്കുന്നത്. 5 മുതല്‍ 10 ശതമാനം വരെ കുട്ടികളില്‍ ഇത്തരം പ്രശ്‌നങ്ങള്‍ കാണുന്നുണ്ട്. ഈ കുട്ടികള്‍ സ്‌കൂള്‍ പഠനത്തില്‍ പിന്നോട്ട് പോകുന്നു.
ലഹരിയുടെ ഉപയോഗം, ശാരീരിക ആരോഗ്യപ്രയാസങ്ങള്‍ എന്നിവയും ഇവരില്‍ കൂടുതലാണ്. വടക്കാഞ്ചേരി മുനിസിപ്പാലിറ്റിയിയും ഓപ്പണ്‍മൈന്റ് കേന്ദ്രം കുറാഞ്ചേരിയുമായി ചേര്‍ന്ന് നടപ്പിലാക്കുന്ന പദ്ധതിയുടെ ഭാഗമായി  നഗരസഭയിലെ  മുഴുവന്‍ ലോവര്‍പ്രൈമറി വിദ്യാര്‍ഥികള്‍ക്കും സൗജന്യമായ പരിശോധനയും വിശദമായ വിദഗ്ധ ഇടപെടലും ഉറപ്പാക്കുന്നതാണ്  പദ്ധതി.  ഇതിന് മുന്നോടിയായി ഡിസംബര്‍ 20, 21 തിയതികളില്‍ കുറാഞ്ചേരി ഓപ്പണ്‍മൈന്റില്‍ വച്ച് പ്രൈമറി, അപ്പര്‍ പ്രൈമറി ടീച്ചര്‍മാര്‍, ബി.ആര്‍.സിയിലെ ബി.പി.ഒ ട്രെയിനര്‍മാര്‍, സി.ആര്‍.സി.സി, ആര്‍.ടി എന്നിവരും, ആരോഗ്യ വകുപ്പിലെ മുതിര്‍ന്ന ഉദ്യോഗസ്ഥരും, അങ്കണവാടി ടീച്ചര്‍മാരും പങ്കെടുക്കുന്ന ശില്‍പശാലയാണ് നടക്കുന്നത്. 20 ന് രാവിലെ 9 ന്  ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍ ഉദ്ഘാടനം ചെയ്യും. നഗരസഭാ ചെയര്‍പേഴ്‌സണ്‍ ശിവപ്രിയ സന്തോഷ് അധ്യക്ഷയാകും.