കൊച്ചി: ആര്‍ത്തിരമ്പുന്ന പതിനായിരങ്ങളുടെ പിന്തുണയില്‍ തിങ്ങി നിറഞ്ഞു നില്‍ക്കുന്ന ഗ്യാലറിക്കു മുന്നില്‍ കളിക്കുമ്പോഴുള്ള ആവശത്തിലാണ് താരങ്ങളെങ്കില്‍ കളിക്കളത്തിനു പുറത്തിരുന്ന് നിര്‍ണയാക തന്ത്രങ്ങള്‍ക്ക് രൂപം നല്‍കുന്ന കോച്ചുമാര്‍ക്ക് വിജയത്തെക്കുറിച്ചും ടീമിനെക്കുറിച്ചും നിറഞ്ഞ പ്രതീക്ഷ.
ഫുട്‌ബോള്‍ പ്രേമികളുടെ പിന്തുണ കരുത്താണ്. പക്ഷേ, അവര്‍ കളിക്കില്ല. കളി മൈതാനത്തിനു അകത്താണ്. പന്ത് തട്ടിത്തുടങ്ങിയാല്‍ കളത്തിനു പുറത്തെ കാര്യങ്ങള്‍ അപ്രസക്തം. ഗോളടിക്കുകയും വഴങ്ങാതിരിക്കുകയും ചെയ്യേണ്ടത് കളിക്കാര്‍ മാത്രമാണ്. കിരീടം ആര്‍ക്കാണോ വേണ്ടത് അവര്‍ മികച്ച രീതിയില്‍ കളിച്ചാലേ മതിയാകൂവെന്നാണ് കേരള ബ്ലാസ്റ്റേഴ്‌സിന്റെ പരിശീലകന്‍ സ്റ്റീവ് കോപ്പലിന്റെ നിലപാട്.
 കാണികള്‍ കേരള ബ്ലാസ്റ്റേഴ്‌സിന് കരുത്താണെന്നു സമ്മതിക്കുന്ന അത്‌ലറ്റിക്കോ ഡി കൊല്‍ക്കത്തയുടെ പരിശീലകന്‍ ഹൊസൈ മൊളീന വിജയം തങ്ങള്‍ക്കുള്ളതാണെന്ന ആത്മവിശ്വാസത്തില്‍ തന്നെയാണ്. മഞ്ഞയില്‍ മുങ്ങുന്ന ഗ്യാലറിയെ അല്ല മുന്നിലുള്ള പതിനൊന്നു പേരുടെ ടീമിനെയാണ് കളിക്കളത്തില്‍ തങ്ങള്‍ ടാര്‍ജറ്റ് ചെയ്യുന്നതെന്നാണ് അദ്ദേഹത്തിന്റെ പക്ഷം. തോല്‍പ്പിക്കാന്‍ ഏറെ ബുദ്ധിമുട്ടുള്ള ടീമാണ് ബ്ലാസ്റ്റേഴ്‌സ്. കാണികളുടെ നിറഞ്ഞ പിന്തുണയുമാകുമ്പോള്‍ ബുദ്ധിമുട്ട് വര്‍ധിക്കും.
സീസണില്‍ ഏറ്റവും കൂടുതല്‍ സ്ഥിരത കാണിച്ച ടീമാണ് കൊല്‍ക്കത്ത. എന്നാല്‍ അതില്‍ കാര്യമില്ല. രണ്ടു കളി മാത്രമേ തോറ്റിട്ടുള്ളൂ എന്നത് സത്യമാണ്. പക്ഷേ, എല്ലാ ടീമുകളെയും ഞങ്ങള്‍ ബഹുമാനിക്കുന്നതായും മൊളീന പറഞ്ഞു.