തിരൂര്‍: തുഞ്ചത്ത് എഴുത്തച്ഛന്റെ നാട് ആദ്യമായി ആതിഥ്യമരുളുന്ന 29-ാമത് ജില്ലാ സ്‌കൂള്‍ കലോല്‍സവത്തിന് അരങ്ങുണരാന്‍ ഇനി 16 ദിവസം. ജനുവരി മൂന്നു മുതല്‍ ഏഴു വരെയാണ് ജില്ലയിലെ 17 ഉപജില്ലകളില്‍ നിന്നായി 2500 ഓളം കലാപ്രതിഭകള്‍ മാറ്റുരയ്ക്കുന്ന കലാമാമാങ്കം. തിരൂര്‍ ഗവ. ബോയ്‌സ് ഹയര്‍ സെക്കന്‍ഡറി സ്‌കൂളിലെ പ്രധാന വേദിയടക്കം സമീപത്തായി 16 വേദികളിലായാണ് സ്റ്റേജ് ഇനങ്ങള്‍ അരങ്ങേറുക. ബോയ്‌സ് ഹൈസ്‌കൂള്‍, പോളിടെക്‌നിക്ക് കോളജ്, പോളിടെക്‌നിക്ക് ഹോസ്റ്റല്‍, പഞ്ചമി സ്‌കൂള്‍, ബി.പി അങ്ങാടി ഗേള്‍സ് ഹയര്‍ സെക്കന്‍ഡറി സ്‌കൂള്‍, ഡയറ്റ് ഹാള്‍, ബി.പി അങ്ങാടി ജി.എല്‍.പി സ്‌കൂള്‍ തുടങ്ങിയ വേദികളിലാണ് കലാമേള. ഇതിനു മുന്നോടിയായി സ്റ്റേജിതര മത്സരങ്ങളും നടക്കും.
ജനുവരി മൂന്നിന് രാവിലെ 10ന് രജിസ്‌ട്രേഷന്‍ ആരംഭിക്കും. വൈകിട്ട് മൂന്നിന് തെക്കുമുറി പൊലിസ് ലൈന്‍ പരിസരത്തു നിന്നും വാദ്യമേളങ്ങളുടെ അകമ്പടിയോടെ സാംസ്‌കാരിക ഘോഷയാത്ര ആരംഭിക്കുന്നതോടെ ജില്ലാ കലോത്സവത്തിന് നാന്ദി കുറിക്കും. തുടര്‍ന്ന് നാലു പ്രധാന വേദിയില്‍ ഉദ്ഘാടന ചടങ്ങുകള്‍ നടക്കും. ജനുവരി നാലിനു രാവിലെ ഒന്‍പതു മുതല്‍ കലാമത്സരങ്ങള്‍ക്ക് തുടക്കമാകും. ഇതേ ദിവസം ബിപി അങ്ങാടി ഗേള്‍സ് ഹയര്‍ സെക്കന്‍ഡറി സ്‌കൂളില്‍ ഓഫ് സ്റ്റേജ് മല്‍സരങ്ങളും നടക്കും. കലോത്സവത്തിനെത്തുന്ന വിദ്യാര്‍ഥികള്‍ക്കും അധ്യാപകര്‍ക്കും മറ്റ് ഒഫിഷ്യല്‍സിനുമായി വിപുലമായ ഭക്ഷണപ്പുര പോളിടെക്‌നിക്ക് ഗ്രൗണ്ടിലാണ് ഒരുക്കുക. ക്രിസ്തുമസ് അവധിക്ക് സ്‌കൂളുകള്‍ അടക്കുന്നതിനു മുന്‍പ് പ്രോഗ്രാം ചാര്‍ട്ട് പൂര്‍ണമാക്കാനാണ് തീരുമാനം.