കുന്നംകുളം: കോളേജ് വിദ്യാര്‍ഥിനിക്ക് തെരുവ് നായയുടെ കടിയേറ്റു. ഗുരുവായൂര്‍ ശ്രീകൃഷ്ണ കോളജിലെ ഡിഗ്രി വിദ്യാര്‍ഥിനി ആല്‍ത്തറ വെള്ളിയരങ്ങത്ത് ജയാനന്തന്റെ മകള്‍ ശ്രീലക്ഷ്മി (21) ക്കാണു കടിയേറ്റത്. വൈകിട്ട് 3.45 ഓടെയായിരുന്നു സംഭവം.
കോളജില്‍ നിന്ന് ക്ലാസ് കഴിഞ്ഞു കുന്നംകുളത്തെ പാരലല്‍ കോളജിലേക്ക് ട്യൂഷനു പോകും വഴി മുസ്‌ലിംപള്ളിക്ക് സമീപത്ത് വച്ച് തെരുവ് നായ ഓടിക്കുകയായിരുന്നു. ശ്രീലക്ഷ്മി ഓടി രക്ഷപ്പെടാന്‍ ശ്രമിച്ചെങ്കിലും ഒപ്പം മറ്റു നായകള്‍ കൂടി കൂട്ടമായി എത്തി വളയുകയും ആക്രമിക്കുകയുമായിരുന്നു. ബഹളം കേട്ട് ഓടിയെത്തിയ പരിസര വാസികളാണ് രക്ഷപ്പെടുത്തി കന്നംകുളം താലൂക്ക് ആശുപത്രിയിലെത്തിച്ചത്. കാലിന്റെ തുടയിലാണ് കടിയേറ്റത്. വിദഗ്ധ ചികിത്സക്കായി പിന്നീട് ഇവരെ മെഡിക്കല്‍ കോളജിലേക്ക് മാറ്റി.