കോട്ടയം: ഹരിത കേരളം പദ്ധതിയുടെ ഭാഗമായി ജില്ലയില്‍ 230 ഏക്കര്‍ തരിശു ഭൂമിയില്‍ കൃഷിയിറക്കാന്‍ പദ്ധതി. ഇതില്‍ 163.7 ഹെക്ടറില്‍ ഇതിനകം കൃഷിയിറക്കി കഴിഞ്ഞു. ബാക്കിയുള്ള 66.3 ഹെക്ടര്‍ സ്ഥലത്തും ഈ മാസം തന്നെ കൃഷിയിറക്കും.
മാടപ്പള്ളി ബ്ലോക്ക് പരിധിയിലുള്ള കൊച്ചുകരുവേലിപ്പാടം, താമരശ്ശേരിക്കടവ് പാടം, പോളശ്ശേരിപ്പാടം എന്നിവിടങ്ങളിലെ 3.3 ഹെക്ടര്‍ സ്ഥലത്ത് യഥാക്രമം ചങ്ങനാശ്ശേരി, വാഴപ്പള്ളി, വാകത്താനം കൃഷി ഭവനുകളുടെ ആഭിമുഖ്യത്തില്‍ കൃഷിയിറക്കിയിട്ടുണ്ട്. കടുത്തുരുത്തി ബ്ലോക്കു പരിധിയില്‍ കടുത്തുരുത്തി കൃഷി ഭവന്റെ കീഴില്‍ വരുന്ന മാന്നാര്‍ മിച്ച ഭൂമി, വാലാച്ചിറ, എരുമത്തുരുത്ത് കിഴക്കുപുറം, എരുമത്തുരുത്ത് പടിഞ്ഞാപ്പുറം, മന്നാര്‍ തെക്കുംപുറം, മാത്താംകരി, വെള്ളാശ്ശേരി പാടശേഖരങ്ങളും കല്ലറ കൃഷി ഭവന്റെ പരിധിയിലുള്ള പുതുപപ്പള്ളി, മറ്റത്തിക്കുന്നേക്കരി, തലയോലപ്പറമ്പ് കൃഷി ഭവന്റെ പരിധിയിലുള്ള ആലങ്കേരി, വെള്ളൂര്‍ കൃഷി ഭവന്‍ പരിധിയിലുള്ള ഉറുമ്പയം, പള്ളിത്താഴം എന്നീ പാടശേഖരങ്ങളിലുമായി 63 ഹെക്ടറിലും കൃഷിയിറക്കി കഴിഞ്ഞു.
പാമ്പാടിയില്‍ ചേര്‍പ്പുങ്കല്‍, പിരയാര്‍ മുക്കാടന്‍, ചെമ്പിലവ്, പിരയാര്‍ പുഞ്ച (കിടങ്ങൂര്‍ കൃഷിഭവന്‍), കാവുംപടി തോട്ടുഭാഗം (അകലക്കുന്നം), എം.വി.എം. (മണര്‍കാട്) പാടശേഖരങ്ങളിലായി അഞ്ചും ഏറ്റുമാനൂര്‍ ഓണംതുരുത്ത് കിഴക്കുപുറം, ക്ലാക്കില്‍പാടം (നീണ്ടൂര്‍), തോട്ടുങ്കല്‍ പടവ്, കോയിച്ചാല്‍, തെള്ളകം, വുന്നതുരുത്ത്, ചാര്‍ത്താലി, ഇരവേശ്വരം, മെത്രാന്‍ കായല്‍, ചാഴി വളര്‍ത്തുകരി (ആര്‍പ്പൂക്കര കൃഷി ഭവന്‍) പാടശേഖരങ്ങളില്‍ 38 ഹെക്ടറിലും വിത്തു വിത പൂര്‍ത്തിയായി വരുന്നു. കോട്ടയത്ത് നാട്ടകം കൃഷി ഭവന്‍ പരിധിയിലുള്ള ഗ്രാവ് പാടശേഖരത്തും കുറിച്ചി പരിധിയിലുള്ള പടവുംപാടം, കക്കുഴി പാടം, അയര്‍ക്കുന്നം അമയന്നൂര്‍ പാടം, കുമാരനല്ലൂര്‍ മൂഴൂര്‍ പാടം, കരിയംപാടം, പനച്ചിക്കാട് ചെല്ലിച്ചിറപാടം, കോയ്ക്കാട്ടുചാല്‍ എന്നീ പാടശേഖരങ്ങളിലായി 32.7 ഹെക്ടറിലും കൃഷി ആരംഭിച്ചിട്ടുണ്ട്.
കോയ്ക്കാട്ടുചാല്‍ പാടശേഖരത്ത് ഏഴു ഹെക്ടറില്‍ കൃഷിയിറക്കല്‍ പൂര്‍ത്തിയായി. മറവന്‍ തുരുത്ത് സ്‌കാറ്റേഡ്, വൈക്കം നാറാണത്തു പാടശേഖരം, ഉദയനാപുരം മാനാപ്പള്ളി, വെച്ചൂര്‍ ഇലഞ്ഞിക്കര്‍ത്തടം, തലയാഴം മുണ്ടാര്‍, അരിക്കുപുറം അക്ഷയ, ഐശ്വര്യ പാടശേഖരങ്ങളിലെ 47.8 ഹെക്ടര്‍ തരിശു ഭൂമിയിലെ 20 ഹെക്ടറിലും കൃഷി ആരംഭിച്ചു. കാണക്കാരി വലിയവാരം പാടം, മരങ്ങാട്ടുപിള്ളി പാടം, വെളിയന്നൂര്‍ പാടം, മാഞ്ഞൂര്‍ കുരിയാഞ്ചല്‍, ആനിത്താനം, പെരുംകരി, മങ്ങാട്ടുചിറ, കിഴത്തിരി പാടശേഖരങ്ങളിലായി 38.2 ഹെക്ടറിലും കരൂര്‍ തേവലപ്പറമ്പ് പാടം, തൊണ്ടിയോട് ചെറുനിലം, മീനച്ചില്‍ നരിതൂക്കില്‍ പാടം എന്നിവിടങ്ങളിലെ 1.6 ഹെക്ടറും ഉള്‍പ്പെടെയുള്ള 230 ഹെക്ടറിലാണ് ഈ മാസം വിത്തുവിത പൂര്‍ത്തിയാകുന്നത്.