പാനൂര്‍: തൃപ്പങ്ങോട്ടൂര്‍ ഗ്രാമപഞ്ചായത്തിലെ ആരോഗ്യ വിഭാഗവും പഞ്ചായത്തും സംയുക്തമായി നടത്തിയ പരിശോധനയില്‍ കല്ലിക്കണ്ടി ടൗണില്‍ പഴകിയ ഭക്ഷണ സാധനങ്ങള്‍ വില്‍പന നടത്തിയ കടപൂട്ടിച്ചു. കല്ലിക്കണ്ടി ടൗണിലെ ഫ്രഷ് പോയിന്റ് എന്ന കടയാണ് അധികൃതര്‍ പൂട്ടിച്ചത്. വിവിധ കടകളില്‍ നടത്തിയ പരിശോധനയില്‍ പ്ലാസ്റ്റിക്ക് ക്യാരിബാഗുകള്‍ പിടിച്ചെടുത്തു. ലൈസന്‍സില്ലാതെ പ്രവര്‍ത്തിച്ച കടകള്‍ക്കും പ്ലാസ്റ്റിക്ക് ക്യാരിബാഗുകള്‍ സൂക്ഷിച്ച കടകള്‍ക്കും പിഴ ചുമത്തുകയും ചെയ്തിട്ടുണ്ട്. പഞ്ചായത്തില്‍ സമ്പൂര്‍ണ ശുചിത്യം നടപ്പിലാക്കുന്ന പ്രവര്‍ത്തനത്തിന്റെ ഭാഗമായുള്ള തീവ്ര യജ്ഞത്തിന്റെ ഭാഗമായാണ് ആരോഗ്യവകുപ്പും പഞ്ചായത്ത് അധികൃതരും കടകളില്‍ പരിശോധന നടത്തിയത്. പരിശോധനയ്ക്ക് സെക്രട്ടറി എം.കെ സജിത്കുമാര്‍, ഹെല്‍ത്ത് ഇന്‍സ്‌പെക്ടര്‍ ബീന കുര്യന്‍ നേത്യത്വം നല്‍കി. വരും ദിവസങ്ങളിലും കടകളിലും മറ്റു സ്ഥാപനങ്ങളിലും കര്‍ശന പരിശോധന തുടരുമെന്ന് ഗ്രാമപഞ്ചായത്ത് പ്രസിഡന്റ് മുഹമ്മദ് കാട്ടൂര്‍ പറഞ്ഞു.