ചെറുപുഴ: ചെറുപുഴയിലെ സ്വകാര്യ പണമിടപാടു സ്ഥാപനത്തിലെത്തി 24000 രൂപ കവര്‍ന്ന കേസില്‍ ദക്ഷിണാഫ്രിക്കന്‍ സ്വദേശികള്‍ പിടിയില്‍. ജ്വല്ലറി കവര്‍ച്ചക്കേസില്‍ കോഴിക്കോട് പന്നിയങ്കര പൊലിസ് കഴിഞ്ഞ ദിവസം പിടികൂടിയ ആഫ്രിക്കന്‍ വംശജര്‍ തന്നെയാണ് ചെറുപുഴയിലും തട്ടിപ്പ് നടത്തിയതെന്ന് തിരിച്ചറിഞ്ഞതായി പൊലിസ് പറഞ്ഞു. ദക്ഷിണാഫ്രിക്കയിലെ പ്രിട്ടോറിയയില്‍ നിന്നുള്ള ബൊറോമണ്ട് സാദിഖ് മുഹമ്മദ്, ഹോകന്‍ ഹുസൈന്‍ എന്നയാളുടെ ഭാര്യ ബാഗെരി മന്‍സാര്‍ എന്നിവരാണ് ജ്വല്ലറിയില്‍ നിന്നു പട്ടാപ്പകല്‍ സ്വര്‍ണം കവര്‍ന്നത്. ചെറുപുഴയില്‍ തട്ടിപ്പ് നടത്തിയവരുടെ ദൃശ്യങ്ങളും സമീപത്തെ സി.സി.ടി.വി ക്യാമറയില്‍ പതിഞ്ഞിരുന്നു. ഈ ദൃശ്യങ്ങള്‍ കോഴിക്കോട് പൊലിസിന് കൈമാറിയാണ് പ്രതികള്‍ പിടിയിലായവര്‍ തന്നെയാണെന്ന് സ്ഥിരീകരിച്ചത്. അടുത്തിടെ മാനന്തവാടിയിലെ സ്വകാര്യ പണമിടപാട് സ്ഥാപനത്തിലെത്തി കറന്‍സി മാറ്റാനെന്ന പേരില്‍ യൂറോ തട്ടിയതും ഇതേ സംഘമാണെന്ന നിഗമനത്തിലാണ് പൊലിസ്. തെളിവെടുപ്പിനായി പ്രതികളെ അടുത്ത ദിവസം ചെറുപുഴയിലെത്തിക്കും.