കൊണ്ടോട്ടി: ഒഴുകൂര്‍ ജി.എം.യു.പി സ്‌കൂളിന്റെയും ദേശീയ തൊഴിലുറപ്പു പദ്ധതിയുടെയും ആഭിമുഖ്യത്തില്‍ ഹരിതകേരളം പരിപാടിയുടെ ഭാഗമായി മഴത്തുള്ളിക്കൊരിടം പദ്ധതിക്കു തുടക്കമായി. മൊറയൂര്‍ ഗ്രാമപഞ്ചായത്തിലെ ഒന്ന്, രണ്ട് ,മൂന്ന്, 16, 17, 18 വാര്‍ഡുകളിലാണ് പദ്ധതി നടപ്പിലാക്കുന്നത്. വിദ്യാര്‍ഥികളും തൊഴിലുറപ്പുതൊഴിലാളികളായ അമ്മമാരും ചേര്‍ന്നാണ് മഴക്കുഴി നിര്‍മിക്കുന്നത്. മേഖലയില്‍ ആയിരം മഴക്കുഴിയെങ്കിലും നിര്‍മിക്കുകയാണ് ലക്ഷ്യം. സ്‌കൗട്ട് ആന്‍ഡ് ഗൈഡ്‌സിന്റയും സഹകരണത്തോടെയാണ് പരിപാടി. രണ്ടാം വാര്‍ഡായ പള്ളിമുക്കില്‍ മൊറയൂര്‍ ഗ്രാമപഞ്ചായത്ത് പ്രസിഡന്റ് സലിം മാസ്റ്റര്‍ പദ്ധതി ഉദ്ഘാടനം ചെയ്തു. വാര്‍ഡംഗം അയ്യപ്പന്‍ ചെമ്പട്ട അധ്യക്ഷനായി. പി.ടി.എ പ്രസിഡന്റ് കെ.ജാബിര്‍, എസ്.എം.സി ചെയര്‍മാന്‍ പി. ലത്തീഫ്, പ്രധാനാധ്യാപകന്‍ അബ്ദു വിലങ്ങപ്പുറം, സ്‌കൗട്ട്‌സ് മാസ്റ്റര്‍ ആര്‍.കെ ദാസ്, ഗൈഡ്‌സ് ക്യാപ്റ്റന്‍ പി. ബിജി,  കെ. ഷബീബ് റഹ്മാന്‍ നേതൃത്വം നല്‍കി.