മാഡ്രിഡ്: ബാല്ലണ്‍ ഡി ഓര്‍ പുരസ്‌കാരം കിട്ടാത്തതുകൊണ്ട് താന്‍ മരിക്കാനൊന്നും പോകുന്നില്ലെന്നു ബാഴ്‌സലോണയുടെ ബ്രസീല്‍ താരം നെയ്മര്‍. ഫുട്‌ബോള്‍ കളിക്കുന്നത് വ്യക്തിഗത നേട്ടങ്ങള്‍ക്കു വേണ്ടിയല്ലെന്നും നെയ്മര്‍ പറഞ്ഞു. ലാ ലിഗയുടെ ഒദ്യോഗിക വെബ്‌സൈറ്റിനു നല്‍കിയ അഭിമുഖത്തിലാണ് സൂപ്പര്‍ താരം നയം വ്യക്തമാക്കിയത്. ബാല്ലണ്‍ ഡി ഓര്‍ പുരസ്‌കാരം ഏതൊരു ഫുട്‌ബോള്‍ താരത്തിനും ലഭിക്കുന്ന പ്രചോദനമാണ്. എന്നാല്‍ പുരസ്‌കാരം ലഭിച്ചില്ല എന്നതുകൊണ്ട് മരിക്കാന്‍ താനില്ലെന്നുമാണ് നെയ്മര്‍ വ്യക്തമാക്കിയത്.
കഴിഞ്ഞ വര്‍ഷം പുരസ്‌കാരത്തിനുള്ള അവസാന മൂന്നു പേരിലെത്താന്‍ നെയ്മറിനു സാധിച്ചിരുന്നു. അവസാന നിമിഷം ബാഴ്‌സലോണയിലെ സഹ താരം ലയണല്‍ മെസ്സി പുരസ്‌കാര ജേതാവാകുകയായിരുന്നു. എന്നാല്‍ ഇത്തവണ ചുരുക്കപ്പട്ടികയിലെ ആദ്യ മൂന്നിലെത്താന്‍ താരത്തിനു സാധിച്ചിരുന്നില്ല. ബാഴ്‌സലോണയില്‍ നില്‍ക്കുന്നത് സന്തോഷം തരുന്ന കാര്യമാണ്. വ്യക്തിപരമായും ബാഴ്‌സോണയെന്ന ടീമിനെ സംബന്ധിച്ചും ഇനിയും മുന്നോട്ടു സഞ്ചരിക്കാനുണ്ടെന്നും നെയ്മര്‍ കൂട്ടിച്ചേര്‍ത്തു.