പൊഴുതന: എസ്.കെ.എസ്.എസ്.എഫ് സംസ്ഥാന കമ്മിറ്റിയുടെ ആഭിമുഖ്യത്തില്‍ നടന്നു വരുന്ന ലീഡേഴ്‌സ് കാരവന്‍ ജില്ലയിലും തുടക്കം കുറിച്ചു. ജില്ലയെ 25 ക്ലസ്റ്ററുകളാക്കി മുഴുവന്‍ ശാഖകളൂടെയും മിനുട്‌സ് ബുക്ക്, റിപ്പോര്‍ട്ട് ബുക്ക്, അക്കൗണ്ട് ബുക്ക്, സീല്‍, ലെറ്റര്‍പാഡ്, റസിപ്റ്റ് വൗച്ചര്‍ തുടങ്ങി എല്ലാ ആധികാരിക രേഖകളും സംസ്ഥാന കമ്മിറ്റി പരിശോധിച്ച് സീല്‍ ചെയ്യും. അദാലത്തിന്റെ ഭാഗമായി യൂനിറ്റുകളൂടെ സമ്പൂര്‍ണ സോഷ്യല്‍ സര്‍വേ ഫോം, അഞ്ച് സത്യധാരാ വാര്‍ഷിക വരിക്കാരുടെ ലിസ്റ്റ്, ഫെബ്രുവരി 17, 18, 19, തിയതികളില്‍ മീനങ്ങാടിയില്‍ നടക്കുന്ന മദീനാ പാഷന്‍ ക്യാംപ് പ്രതിനിധികളുടെ ബയോഡാറ്റ എന്നിവയും അദാലത്തില്‍ സ്വീകരിക്കും. അദാലത്ത് പൂര്‍ണമാക്കുന്ന ശാഖക്ക് സംസ്ഥാന കമ്മിറ്റി അംഗീകരിച്ച യൂനിറ്റുകളുടെയും ക്ലസ്റ്ററുകളുടെയും പ്രവര്‍ത്തനങ്ങളെ ഏകീകരിക്കുന്നതിന്റെ ഭാഗമായി ഓഫിസ് കിറ്റുകളും ശാഖകള്‍ക്ക് വിതരണം ചെയ്യുന്നുണ്ട്. ജനുവരി ഒന്നുവരെ നടക്കുന്ന ലീഡേഴ്‌സ് കാരവനില്‍ അംഗീകാരമുള്ള 167 ശാഖകളുടെ മുഴുവന്‍ രേഖകളും പരിശോധിക്കും. പുതുതായി രൂപീകരിക്കപ്പെട്ട ശാഖകള്‍ക്ക് അംഗീകാരം നേടാനുള്ള സൗകര്യവും അദാലത്തില്‍ ഉണ്ട്.
ജില്ലയില്‍ സംസ്ഥാന പ്രതിനിധി കെ.എന്‍.എസ് മൗലവിയുടെയും പ്രസിഡന്റ് ശൗഖത്തലി വെള്ളമുണ്ടയുടെയും സെക്രട്ടറി അയ്യൂബ് മുട്ടിലിന്റെയും നേതൃത്വത്തിലുള്ള 10 സ്ഥിരം പ്രതിനിധികളാണ് ലീഡേഴ്‌സ് കാരവന് നേതൃത്വം നല്‍കുന്നത്. ഇന്നലെ പൊഴുതനയില്‍ നടന്ന ഉദ്ഘാടന സംഗമം ശിഹാബ് ഫൈസി ഉദ്ഘാടനം ചെയ്തു. കെ.എന്‍.എസ് മൗലവി, അയ്യുബ് മുട്ടില്‍, മൊയ്തീന്‍കുട്ടി യമാനി, സാജിദ് മൗലവി, ജലീല്‍ വൈത്തിരി, അജ്മല്‍ പൊഴുതന, അലി കൂളിവയല്‍ സംസാരിച്ചു. പൊഴുതന, പടിഞ്ഞാറത്തറ, വെള്ളമുണ്ട ക്ലസ്റ്ററുകള്‍ പൂര്‍ത്തിയാക്കിയ കാരവന്‍ ഇന്ന് തരുവണയില്‍ നിന്നാരംഭിക്കും.