കൊടുവള്ളി: കിഴക്കോത്ത് ജനവാസ കേന്ദ്രത്തോടു ചേര്‍ന്ന ഭാഗത്തു പുലിയെ കണ്ടെന്ന വാര്‍ത്തയെ തുടര്‍ന്നു പരിഭ്രാന്തരായി പ്രദേശവാസികള്‍. ഇന്നലെ വൈകിട്ട് അഞ്ചോടെ പ്രദേശവാസിയായ ഒരാള്‍ പുതുവയലില്‍ പശുവിനെ അഴിച്ചുകൊണ്ടു വരാനായി പോയപ്പോഴാണത്രെ പുലിയെ കണ്ടത്. തുടര്‍ന്നു പ്രദേശത്തെ മറ്റൊരാളും പുലിയെ നേരില്‍ കണ്ടതായി പ്രചാരണമുണ്ട്.
പ്രദേശത്തു പ്രവര്‍ത്തിച്ചിരുന്ന അരി മില്ല് യൂനിറ്റിനോടു ചേര്‍ന്ന കാടുമൂടിയ ഭാഗത്തേക്കു നടന്നുപോയെന്നാണു നാട്ടുകാര്‍ പറയുന്നത്. വിവരം പരന്നതോടെ പ്രദേശത്തേക്കു നിരവധിയാളുകളാണ് എത്തിയത്. വൈകിട്ട് ആറോടെ കൊടുവള്ളി പൊലിസും സ്ഥലത്തെത്തി. നാട്ടുകാര്‍ നല്‍കിയ വിവരത്തിന്റെ അടിസ്ഥാനത്തില്‍ രാത്രി ആളുകളോടു പുറത്തിറങ്ങി നടക്കരുതെന്നു നിര്‍ദേശം നല്‍കി. വനം വകുപ്പ് അധികൃതരെയും വിവരം അറിയിച്ചിട്ടുണ്ട്. സംഘം ഇന്നു രാവിലെ സംഭവസ്ഥലത്തെത്തി വിശദമായ പരിശോധന നടത്തുമെന്നു നാട്ടുകാരെ അറിയിച്ചു.