താമരശേരി: ശിഹാബ് തങ്ങള്‍ സോഷ്യല്‍ വെല്‍ഫെയര്‍ സ്‌കീം(നന്മ) കോരങ്ങാട് ചാപ്റ്ററിന്റെ നാലാം വാര്‍ഷിക പരിപാടികള്‍ക്കു നാളെ തുടക്കമാവും.
കോരങ്ങാട് പ്രദേശത്തുനിന്ന് ഉന്നത പദവികളിലേക്കുള്ള ഉദ്യോഗാര്‍ഥികളെ സൃഷ്ടിക്കുന്നതിനുള്ള വിദ്യാഭ്യാസ പ്രവര്‍ത്തനങ്ങള്‍ക്കും വീടില്ലാത്ത നിര്‍ധനരായ മുഴുവന്‍ കുടുംബങ്ങള്‍ക്കും വീട് നിര്‍മിച്ചുനല്‍കുന്നതിനും നേതൃത്വം നല്‍കുമെന്നു ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. നിര്‍ധന രോഗികള്‍ക്ക് ആശ്വാസമായി ആംബുലന്‍സ് വാങ്ങി സര്‍വിസ് നടത്തുമെന്നും ഭാരവാഹികള്‍ അറിയിച്ചു.
പരിപാടിയുടെ ഭാഗമായി വിവിധ ദിവസങ്ങളില്‍ മതപ്രഭാഷണം നടക്കും. 30ന് സിംസാറുല്‍ ഹഖ് ഹുദവി, 31ന് ഹാഫിള് ഇ.പി അബൂബക്കര്‍ മൗലവി അല്‍ഖാസിമി, ഒന്നിന് ഹാഫിള് സിറാജുദ്ദീന്‍ അല്‍ഖാസിമി കൊല്ലം, രണ്ടിന് ഷമീര്‍ ദാരിമി കൊല്ലം, മൂന്നിന് ഹാഫിള് അഹമ്മദ് കബീര്‍ ബാഖവി എന്നിവര്‍ പ്രഭാഷണം നടത്തും. വി.എം ഉമ്മര്‍ മാസ്റ്റര്‍, കാടാമ്പുഴ തങ്ങള്‍, എം.എ റസ്സാഖ് മാസ്റ്റര്‍, സൈനുല്‍ ആബിദീന്‍ തങ്ങള്‍, സി. മോയിന്‍കുട്ടി വിവിധ ദിവസങ്ങളില്‍ മതപ്രഭാഷണ പരിപാടി ഉദ്ഘാടനം ചെയ്യും.
വാര്‍ത്താസമ്മേളനത്തില്‍ നന്മ ചെയര്‍മാന്‍ പി.എ അബ്ദുസ്സമദ് ഹാജി, കണ്‍വീനര്‍ അഷ്‌റഫ് കോരങ്ങാട്, പി.എം സയ്യിദ് തങ്ങള്‍, എ.പി മുഹമ്മദലി, എ.പി ഹബീബ് റഹ്മാന്‍, സുബൈര്‍ വെഴുപ്പൂര്‍, എ.പി സമദ് പങ്കെടുത്തു.