പോര്‍ട് എലിസബത്ത്: ദക്ഷിണാഫ്രിക്കയും ശ്രീലങ്കയും തമ്മിലുള്ള ഒന്നാം ക്രിക്കറ്റ് ടെസ്റ്റ് ആവേശകരമായ അന്ത്യത്തിലേക്ക്. നാലാം ദിനം കളി നിര്‍ത്തുമ്പോള്‍ 488 റണ്‍സ് വിജയ ലക്ഷ്യത്തിലേക്ക് ബാറ്റു വീശുന്ന ശ്രീലങ്ക അഞ്ചു വിക്കറ്റ് നഷ്ടത്തില്‍ 240 റണ്‍സെന്ന നിലയില്‍. ഒരു ദിവസവും അഞ്ചു വിക്കറ്റുകളും കൈയിലിരിക്ക് ലങ്കക്ക് 248 റണ്‍സ് കൂടി വേണം വിജയിക്കാന്‍.
ആദ്യ ഇന്നിങ്‌സില്‍ ദക്ഷിണാഫ്രിക്ക 286നു പുറത്തായപ്പോള്‍ ലങ്കയുടെ പോരാട്ടം 205ല്‍ അവസാനിച്ചു. രണ്ടാമിന്നിങ്‌സില്‍ ആറു വിക്കറ്റ് നഷ്ടത്തില്‍ 406 റണ്‍സെന്ന മികച്ച സ്‌കോര്‍ പടുത്തുയര്‍ത്തി ദക്ഷിണാഫ്രിക്ക ലങ്കയ്ക്ക് മുന്നില്‍ 488 റണ്‍സിന്റെ വിജയ ലക്ഷ്യം വച്ചു. കളി നിര്‍ത്തുമ്പോള്‍ നായകന്‍ മാത്യൂസ് 58 റണ്‍സുമായി ക്രീസിലുണ്ട്. ഒന്‍പതു റണ്‍സുമായി ധനഞ്ജയ സില്‍വയാണ് നായകനു കൂട്ടായി ഉളളത്.
നേരത്തെ ഓപണര്‍ സ്റ്റീഫന്‍ കുക്ക് (117) നേടിയ സെഞ്ച്വറിയാണ് ദക്ഷിണാഫ്രിക്കക്ക് മികച്ച സ്‌കോര്‍ രണ്ടാമിന്നിങ്‌സില്‍ സമ്മാനിച്ചത്. മധ്യനിരയില്‍ ക്വിന്റന്‍ ഡി കോക്ക് (69), പുറത്താകാതെ 67 റണ്‍സെടുത്തു നായകന്‍ ഡു പ്ലസിസ് എന്നിവര്‍ മികച്ച സംഭാവന നല്‍കി.