റിയാദ്: സഊദിയില്‍ ജോലി ചെയ്യുന്ന വിദേശികള്‍ അവരുടെ നാടുകളിലേക്കയക്കുന്ന പണത്തില്‍ ഗണ്യമായ കുറവ് രേഖപ്പെടുത്തി. ഒരു മാസത്തിനിടെ ആറ് ശതമാനമാണ് കുറവ് രേഖപ്പെടുത്തിയത്. രാജ്യത്തു നിലനില്‍ക്കുന്ന തൊഴില്‍ പ്രശ്നങ്ങളും അടുത്ത കാലത്തായി പലപ്പോഴായി ഉയര്‍ത്തുന്ന ഫീസുകളിലെ വര്‍ദ്ധനവുകളുമാണ് വിദേശികളുടെ നാട്ടിലേക്കയക്കുന്ന പണത്തില്‍ വന്‍ കുറവ് രേഖപ്പെടുത്താന്‍ കാരണം. നവംബറില്‍ വിദേശികള്‍ പുറത്തേക്കയച്ചത് 1211 കോടി റിയാലായിരുന്നു. എന്നാല്‍ തൊട്ടു മുന്‍പത്തെ മാസമായ ഒക്ടോബറില്‍ ഇത് 1282 കോടി റിയാലായിരുന്നു.

ഇതോടൊപ്പം രാജ്യത്തെ സ്വദേശികളും അവരുടെ വ്യക്തിപരമായ ആവശ്യത്തിനായി വിദേശ രാജ്യങ്ങളിലെക്കയച്ച പണത്തിലും ഭീമമായ ഇടിവാണ് രേഖപ്പെടുത്തിയത്. ഒരൊറ്റ മാസത്തിനിടക്ക് തന്നെ 21 ശതമാനം കുറവാണ് രേഖപ്പെടുത്തിയത്. ഒക്ടോബറില്‍ സഊദി പൗരന്മാര്‍ വിദേശ രാജ്യങ്ങളിലേക്ക് 536 കോടി റിയാലാണ് അയച്ചിരുന്നത്. എന്നാല്‍ കഴിഞ്ഞ മാസം ഇത് 423 കോടി റിയാലായി കുറയുകയാണുണ്ടായത്.

2016 ല്‍ ഇതുവരെ രാജ്യത്തു തൊഴിലെടുക്കുന്ന വിദേശികള്‍ നിയമാനുസൃത മാര്‍ഗ്ഗത്തിലൂടെ രാജ്യത്തിന് പുറത്തേക്കയച്ചത് 13837 കോടി റിയാലാണ്. കഴിഞ്ഞ വര്‍ഷം ഇതേ കാലയളവിനേക്കാള്‍ നാലു ശതമാനം അഥവാ 548 കോടി റിയാല്‍ കുറവാണിത് . കഴിഞ്ഞ വര്‍ഷം ഇതേ കാലയളവില്‍ വിദേശികള്‍ വിദേശത്തേക്കയച്ച പണത്തിന്റെ അളവ് 14385 കോടി റിയാലായിരുന്നു. എന്നാല്‍ നിയമാനുസൃതമല്ലാത്ത രീതിയില്‍ രാജ്യത്തിന് പുറത്തേക്കൊഴിക്കുന്ന പണത്തിന്റെ അളവ് ഇതിലും എത്രയോ മടങ്ങു വരുമെന്നാണ് കരുതുന്നത്. ബിനാമി ബിസിനസ്സ് നടത്തിയും മറ്റു അനിയന്തിത മാര്‍ഗ്ഗങ്ങള്‍ വഴിയും രാജ്യത്തിന് പുറത്തേക്ക് പണമൊഴുക്കുന്നത് തടയാനായി സഊദി ഭരണകൂടം അതി ശക്തമായ നിലപാടുകളാണ് സ്വീകരിക്കുന്നത്.