ചെന്നൈ: ദേശീയ സീനിയര്‍ വോളിബോള്‍ പുരുഷ വിഭാഗത്തില്‍ കേരളം ചാംപ്യന്‍മാര്‍. എന്നാല്‍ വനിതാ കിരീടം ഇത്തവണയും റെയില്‍വേസ് തന്നെ സ്വന്തമാക്കി. ഇരട്ട കിരീടമെന്ന കേരളത്തിന്റെ മോഹം നടന്നില്ല. പുരുഷ ഫൈനലില്‍ റെയില്‍വേസിനെ പരാജയപ്പെടുത്തിയാണ് കേരളം കിരീടം നേടിയത്. രണ്ടിനെതിരെ മൂന്നു സെറ്റുകള്‍ക്കാണ് കടുത്ത പോരാട്ടം അതിജീവിച്ച് ഉജ്ജ്വല തിരിച്ചുവരവ് നടത്തി കേരളത്തിന്റ പുരുഷ ടീം മുന്നേറിയത്.
സ്‌കോര്‍: 25-17, 20-25, 26-24, 25-27, 15-9. ആദ്യ സെറ്റ് കേരളം സ്വന്തമാക്കിയപ്പോള്‍ രണ്ടാം സെറ്റ് റെയില്‍വേസ് പിടിച്ചു. മൂന്നാം സെറ്റില്‍ കേരളവും നാലാം സെറ്റില്‍ റെയില്‍വേസും ഇഞ്ചോടിഞ്ച് പൊരുതി മത്സരം 2-2നു സമനിലയിലെത്തിച്ചു. നിര്‍ണായകമായ അവസാന സെറ്റില്‍ വര്‍ധിത വീര്യത്തോടെ പൊരുതിയ കേരളം തുടക്കം മുതല്‍ ലീഡ് നിലനിര്‍ത്തി മത്സരവും സെറ്റും 15-9നു നേടിയാണ് കിരീടത്തില്‍ മുത്തമിട്ടത്. വനിതാ ഫൈനലില്‍ കേരളം ഒരിക്കല്‍ കൂടി റെയില്‍വേസിനു മുന്നില്‍ വീണു. ഇത് ഒന്‍പതാം തവണയാണ് കേരളത്തിന്റെ വനിതകള്‍ ഫൈനലില്‍ റെയില്‍വേസിനോടു കീഴടങ്ങുന്നത്. ഒന്നിനെതിരെ മൂന്ന് സെറ്റുകള്‍ക്കാണ് റെയില്‍വേസ് വിജയിച്ചത്. ആദ്യ സെറ്റ് നഷ്ടപ്പെടുത്തിയ കേരളം രണ്ടാം സെറ്റില്‍ തിരിച്ചടിച്ച് മത്സരത്തിലേക്ക് തിരിച്ചുവന്നു. എന്നാല്‍ മൂന്നും നാലും സെറ്റ് റെയില്‍വേസ് സ്വന്തമാക്കി. സ്‌കോര്‍: 21-25, 25-21, 15-25, 21-25.
പുരുഷ വിഭാഗത്തില്‍ തമിഴ്‌നാടും വനിതാ വിഭാഗത്തില്‍ മഹാരാഷ്ട്രയും വെങ്കലം നേടി.