ഖാര്‍ത്തൂം: സുദാനിലെ മുസ്‌ലിം പള്ളിയിലുണ്ടായ വെടിവയ്പില്‍ എട്ടുപേര്‍ കൊല്ലപ്പെട്ടു. കിഴക്കന്‍ സുദാനിലെ ഡര്‍ഫര്‍ സംസ്ഥാനത്തെ അസ്‌റാനിയിലാണു സംഭവം. ആയുധങ്ങളുമായി വന്ന ചെറുപ്പക്കാരന്‍ പള്ളിയില്‍ കയറി വെടിയുതിര്‍ക്കുകയായിരുന്നു. ആക്രമണത്തില്‍ നിരവധി പേര്‍ക്കു പരുക്കേറ്റു.
സംഭവത്തെ തുടര്‍ന്ന് സുദാന്‍ ഭരണകൂടം രാജ്യതലസ്ഥാനത്തടക്കം സൈന്യത്തെ വിന്യസിപ്പിച്ചു സുരക്ഷ ശക്തമാക്കിയിട്ടുണ്ട്. രാജ്യത്ത് ഗോത്രവര്‍ഗക്കാര്‍ തമ്മിലുള്ള അക്രമം ഏറ്റവും കൂടുതല്‍ നിലനില്‍ക്കുന്ന പ്രദേശം കൂടിയാണ് ഡര്‍ഫര്‍.
വംശീയവിദ്വേഷത്തിന്റെ പേരിലാണ് വെടിവയ്പ്പുണ്ടായതെന്നാണു പൊലിസ് നിഗമനം. സംഭവത്തില്‍ ഇതുവരെ സുദാന്‍ സര്‍ക്കാര്‍ ഔദ്യോഗികമായി പ്രതികരിച്ചിട്ടില്ല. അക്രമി തീവ്രവാദസംഘാംഗമാണെന്നാണു പൊലിസ് നല്‍കുന്ന സൂചന.