കൊച്ചി: ജി.സി.ഡി.എ ചെയര്‍മാന്റെ ഔദ്യോഗിക വസതിയില്‍ നിന്നും വീട്ടുപകരണങ്ങള്‍ കാണാതായ സംഭവത്തില്‍ പൊലിസ് അന്വേഷണം ആരംഭിക്കാനിരിക്കേ കാണാതായ സാധനങ്ങള്‍ പ്രത്യക്ഷപ്പെട്ടു തുടങ്ങി.
എ.സികളില്‍ ഒന്നും ചില വീട്ടുപകരണങ്ങളുമാണ് ഇപ്പോള്‍ പഴയ സ്ഥാനത്ത് ഇടം നേടിയത്. സാധനങ്ങള്‍ കാണാതായതിനെത്തുടര്‍ന്നു കെട്ടിടത്തിന്റെയും ഉപകരണങ്ങളുടേയും ചുമതലയുള്ള ഉദ്യോഗസ്ഥരില്‍ നിന്ന് റിപ്പോര്‍ട്ട് ആവശ്യപ്പെട്ടിട്ടുണ്ട്. റിപ്പോര്‍ട്ട് ലഭിക്കുന്ന മുറയ്ക്ക് ഏത് അന്വേഷണം വേണമെന്നു ചെയര്‍മാനും സെക്രട്ടറിയും കൂടിയാലോചിച്ചു തീരുമാനിക്കും.
ചെയര്‍മാനായി ചുമതലയേറ്റ സി.എന്‍ മോഹനന്‍ ഔദ്യോഗിക വസതിയില്‍ എത്തിയപ്പോഴാണു സാധനങ്ങള്‍ നഷ്ടപ്പെട്ടത് കണ്ടെത്തിയത്. മുന്‍ ചെയര്‍മാന്‍ ഉപകരണങ്ങള്‍ തിരിച്ചേല്‍പ്പിച്ചതായി ഒപ്പിട്ടു നല്‍കിയതിനാല്‍ അന്വേഷണം നീളുന്നത് ഉദ്യോഗസ്ഥരിലേക്കാണ്.