അബൂദബി: പരുക്കു മൂലം ഏറെ നാളായി കളത്തില്‍ നിന്നു വിട്ടുനിന്ന മുന്‍ ലോക ഒന്നാം നമ്പര്‍ ടെന്നീസ് താരം സ്‌പെയിനിന്റെ റാഫേല്‍ നദാല്‍ 2016ലെ അവസാന ദിവസത്തില്‍ കിരീട നേട്ടത്തോടെ തിരിച്ചുവരവ് ഉജ്ജ്വലമാക്കി. മുബദല ലോക ടെന്നീസ് ചാംപ്യന്‍ഷിപ്പില്‍ കിരീടം നേടിയാണ് പുതുവത്സരത്തിനെ പ്രതീക്ഷയോടെ വരവേല്‍ക്കാന്‍ സ്പാനിഷ് താരത്തിനു അസരമൊരുങ്ങിയത്. ഫൈനലില്‍ 11ാം റാങ്കിലുള്ള ബെല്‍ജിയം താരം ഡേവിഡ് ഗോഫിനെയാണ് നദാല്‍ വീഴ്ത്തിയത്. സ്‌കോര്‍: 6-4, 7-6 (7-5). മിലോസ് റാവോനിക്കിനെ വീഴ്ത്തി ലോക ഒന്നാം നമ്പര്‍ താരം ബ്രിട്ടന്റെ ആന്‍ഡി മുറെ മൂന്നാം സ്ഥാനം സ്വന്തമാക്കി. സെമിയില്‍ നദാല്‍ റാവോനിക്കിനേയും ഗോഫിന്‍ മുറെയെയുമാണ് വീഴ്ത്തിയത്.