ന്യൂഡല്‍ഹി: മുന്‍ ഐ.എ.എസ് ഉദ്യോഗസ്ഥനായ അനില്‍ ബൈജല്‍ ഡല്‍ഹിയുടെ പുതിയ ലഫ്റ്റനന്റ് ഗവര്‍ണറായി സത്യപ്രതിജ്ഞ ചെയ്ത് അധികാരമേറ്റു. അപ്രതീക്ഷിതമായി രാജിവച്ച നജീബ് ജങ്ങിനു പകരക്കാരനായാണ് ബൈജല്‍ സ്ഥാനമേറ്റത്.

20-ാമത് ഡല്‍ഹി ലഫ്റ്റനന്റ് ഗവര്‍ണറായാണ് 70കാരനായ അനില്‍ ബൈജല്‍ സത്യപ്രതിജ്ഞ ചെയ്തത്. രാവിലെ വടക്കന്‍ ഡല്‍ഹിയിലെ സിവില്‍ ലൈന്‍സിലെ രാജ്‌നിവാസില്‍ നടന്ന ചങ്ങില്‍ ഡല്‍ഹി ഹൈക്കോടതി ചീഫ് ജസ്റ്റിസ് ജി. രോഹിണി സത്യപ്രതിജ്ഞ ചൊല്ലിക്കൊടുത്തു. ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍, ഉപമുഖ്യമന്ത്രി മനീഷ് സിസോദിയ, ദേശീയ സുരക്ഷാ ഉപദേഷ്ടാവ് അജിത് ഡോവല്‍, ഡല്‍ഹി ചീഫ് സെക്രട്ടറി എം.എം കുട്ടി, പ്രതിപക്ഷ നേതാവ് വിജേന്ദ്ര ഗുപ്ത തുടങ്ങിയ പ്രമുഖര്‍ ചടങ്ങില്‍ പങ്കെടുത്തു.
അധികാരമേറ്റ ശേഷം പ്രസിഡന്റ് പ്രണബ് മുഖര്‍ജിക്കും പ്രധാനമന്ത്രി നരേന്ദ്ര മോദിക്കും ബൈജല്‍ നന്ദി രേഖപ്പെടുത്തി. ഡല്‍ഹിയിലെ തെരഞ്ഞെടുക്കപ്പെട്ട സര്‍ക്കാരുമായി ഒന്നിച്ചുപ്രവര്‍ത്തിക്കാനാകുമെന്നാണു പ്രതീക്ഷയെന്നും ക്രമസമാധാനം, സ്ത്രീസുരക്ഷ, മലിനീകരണം, കെട്ടിട നിര്‍മാണം തുടങ്ങിയവയുമായി ബന്ധപ്പെട്ടു നിരവധി പ്രശ്‌നങ്ങളാണ് ഡല്‍ഹി അഭിമുഖീകരിക്കുന്നതെന്നും അവ പരിഹരിക്കാനായി ഒന്നിച്ചു പ്രവര്‍ത്തിക്കാനാകുമെന്നാണു പ്രതീക്ഷയെന്നും ബൈജല്‍ മാധ്യമപ്രവര്‍ത്തകരോട് പറഞ്ഞു. നജീബ് ജങ്ങും ഡല്‍ഹി സര്‍ക്കാരും തമ്മിലുണ്ടായിരുന്ന പ്രശ്‌നങ്ങള്‍ ചൂണ്ടിക്കാണിച്ചപ്പോള്‍, വിഷയം എല്ലാവര്‍ക്കും വ്യക്തമാണെന്നും സര്‍ക്കാരുമായി ഒന്നിച്ചിരുന്ന് കാര്യങ്ങള്‍ ചര്‍ച്ച ചെയ്യുമെന്നും അദ്ദേഹം പ്രതികരിച്ചു.
2006ല്‍ നഗരവികസന മന്ത്രാലയത്തിലെ സെക്രട്ടറിയായാണ് അനില്‍ ബൈജല്‍ വിരമിച്ചത്. വാജ്‌പൈ സര്‍ക്കാരില്‍ ആഭ്യന്തര സെക്രട്ടറിയുടെ പദവിയും വഹിച്ചിരുന്നു. നിലവില്‍ വിവേകാനന്ദ ഇന്റര്‍നാഷനല്‍ ഫൗണ്ടേഷന്‍ എക്‌സിക്യൂട്ടിവ് കൗണ്‍സില്‍ അംഗമാണ് ബൈജല്‍.
കഴിഞ്ഞ മാസം 22നാണ് അപ്രതീക്ഷിതമായി നജീബ് ജങ് ഡല്‍ഹി ലഫ്റ്റനന്റ് ഗവര്‍ണര്‍ പദവി രാജിവച്ചത്. നിരവധി വിഷയങ്ങളില്‍ കെജ്‌രിവാള്‍ സര്‍ക്കാരുമായി അദ്ദേഹം കൊമ്പ് കോര്‍ത്തിരുന്നു.