നിലമ്പൂര്‍: കുന്നത്തുചാല്‍ പ്രണവം ഗ്രന്ഥശാല, ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ് അംഗങ്ങള്‍ കൈകോര്‍ത്തതോടെ മണ്ണുപ്പാടം മുതല്‍ മഹാഗണിവരെയുള്ള പ്ലാസ്റ്റിക് മാലിന്യങ്ങള്‍ നീക്കംചെയ്തു. ചാലിയാറിനെ മാലിന്യ മുക്തമാക്കുക എന്ന ലക്ഷ്യത്തോടെ വലിച്ചെറിയരുത്, പ്ലാസ്റ്റിക്, മാലിന്യമാക്കരുത് ഈ ഭൂമിയെ എന്ന സന്ദേശമുയര്‍ത്തിയാണ് സ്ത്രീകളും കുട്ടികളും മുതിര്‍ന്നവരും ഉള്‍പ്പെടെ 75 പേര്‍ ഇന്നലെ മണ്ണുപ്പാടം ചെക്‌പോസ്റ്റുവരെയുള്ള ഭാഗത്തെ മുഴുവന്‍ പ്ലാസ്റ്റിക്കുകളും നിലമ്പൂര്‍ അകമ്പാടം റോഡില്‍ മണ്ണുപ്പാടം മുതല്‍ മഹാഗണി അതിര്‍ത്തിവരെയുള്ള വനത്തിലെ പ്ലാസ്റ്റിക്കുകള്‍, ഭക്ഷണാവശിഷ്ടങ്ങള്‍, കുപ്പികള്‍ എന്നിവയും ശേഖരിച്ചു.വിനോദ സഞ്ചാരികളായവരും മറ്റും വനത്തിനുള്ളില്‍ വാഹനം കയറ്റി ഭക്ഷണം കഴിക്കുന്നത് മൂലമാണ് പ്ലാസ്റ്റിക് ഉപേക്ഷിക്കുന്നത്. ടി.എസ് സുരേഷ്, സുനില്‍ കമ്മത്ത്, സി.കെ അഭിലാഷ്, എം. സുബ്രഹ്മണ്യന്‍, കെ. വിശ്വാനാഥന്‍, പ്രദീപ്, സതീഷ്, സന്ധ്യ പ്രദീപ്, സുലു കോയിപ്പള്ളി, സജിത ആനപ്പാന്‍, ഗീത വിശ്വനാഥന്‍ എന്നിവരുടെ നേതൃത്വത്തിലാണ് മാലിന്യങ്ങള്‍ നീക്കംചെയ്തത്. റോഡിലൂടെ ബൈക്കുകളിലും മറ്റും കടന്നുപോയ വാഹന യാത്രകാര്‍ക്ക് സന്ദേശടങ്ങിയ നോട്ടീസും വിതരണം ചെയ്തു.