തിരൂര്‍: ജില്ലാ കലോത്സവത്തിന്റെ ഉദ്ഘാടന ചടങ്ങിലും സമാപന സമ്മേളനത്തിലും അതിഥികള്‍ക്കു പൂച്ചെണ്ട് നല്‍കില്ല. പകരം പുസ്തകങ്ങള്‍ സമ്മാനിക്കും. കലോത്സവ ഇനങ്ങളില്‍ വ്യക്തിഗത നേട്ടം കൈവരിക്കുന്ന കൊച്ചുകലാകാരന്‍മാര്‍ക്കും ട്രോഫികള്‍ക്കൊപ്പം പുസ്തകങ്ങളും നല്‍കും.
മൊത്തം 820 വിവിധ പുസ്തകങ്ങളാണ് സമ്മാനിക്കുക. മലയാള സര്‍വകലാശാല അധ്യാപകന്‍ ഡോ. അശോക് ഡിക്രൂസ് ഉള്‍പ്പെടെയുള്ളവര്‍ രചിച്ച പുസ്തകങ്ങളാണ് അതിഥികള്‍ക്കും കലാകാരന്‍മാര്‍ക്കും സമര്‍പ്പിക്കുക. സ്റ്റേജിതര ഇനങ്ങളില്‍ പങ്കെടുക്കുന്ന കലാകാരന്‍മാരുടെ സര്‍ഗസൃഷ്ടികള്‍ പ്രദര്‍ശിപ്പിക്കാനും കഥ, കവിത, ഉപന്യാസ രചനകളില്‍ മികവുപുലര്‍ത്തിയ കുട്ടികള്‍ക്ക് സംസ്ഥാന കലോത്സവ വേദിയില്‍ എത്തുംമുന്‍പ് അസോസിയേഷന്‍ ഓഫ് ക്രിയേറ്റീവ് ടീച്ചേഴ്‌സ് അധ്യാപക കൂട്ടായ്മ ഇത്തവണ പരിശീലനം നല്‍കും.