വഴിക്കടവ്: ആന മറിയില്‍ ഈന്തന്‍കുഴി മുഹമ്മദാലിയുടെ കൃഷിയിടത്തിലെ 300 കുലച്ച നേന്ത്രവാഴകള്‍ ഇന്നലെ പുലര്‍ച്ചെ ഇറങ്ങിയ ആനക്കൂട്ടം നശിപ്പിച്ചു. ആറോളം ആനകളാണ് കൃഷിത്തോട്ടത്തിലിറങ്ങിയത്. പ്രദേശത്ത് കാട്ടാന ശല്യം രൂക്ഷമാണെന്നു നേരത്തെയും നിരവധി പരാതികള്‍ ഉയര്‍ന്നിരുന്നു.
ഒരു മാസം മുന്‍പാണ് പാട്ടക്കര്‍ഷകനായ ബേബി തന്റെ കൃഷി ആനക്കൂട്ടം നശിപ്പിച്ചതില്‍ മനംനൊന്ത് മരത്തില്‍ കയറി ആത്മഹത്യ ഭീഷണി മുഴക്കിയിരുന്നത്. വനപാലകരുടെ ഭാഗത്തുനിന്നു നടപടികള്‍ ഉണ്ടാകുമെന്ന് ഉറപ്പുനല്‍കിയിരുന്നെങ്കിലും നടപടി ഉണ്ടായില്ലെന്ന് കര്‍ഷകര്‍ ആരോപിച്ചു.