സിഡ്‌നി: വെറ്ററന്‍ താരം യൂനിസ് ഖാന്റെ ചെറുത്തുനില്‍പ്പുണ്ടായിട്ടും ആസ്‌ത്രേലിയക്കെതിരായ മൂന്നാം ക്രിക്കറ്റ് ടെസ്റ്റില്‍ പാകിസ്താനു ബാറ്റിങ് തകര്‍ച്ച. സെഞ്ച്വറിയുമായി യൂനിസ് ഖാന്‍ ഒരറ്റത്തു പുറത്താകാതെ നിന്നപ്പോള്‍ പിന്നാലെയെത്തിയവര്‍ വിക്കറ്റ് വലിച്ചെറിഞ്ഞത് പാക് നിരയ്ക്ക് തിരിച്ചടിയായി.
136 റണ്‍സോടെ യൂനിസ് പുറത്താകാതെ നില്‍ക്കുന്നു. മൂന്നാം ദിനം കളി നിര്‍ത്തുമ്പോള്‍ പാകിസ്താന്‍ ഒന്നാം ഇന്നിങ്‌സില്‍ എട്ടു വിക്കറ്റ് നഷ്ടത്തില്‍ 271 റണ്‍സെന്ന നിലയിലാണ്. ആസ്‌ത്രേലിയ ഒന്നാം ഇന്നിങ്‌സില്‍ എട്ടു വിക്കറ്റ് നഷ്ടത്തില്‍ 538 റണ്‍സെടുത്ത് ഡ്ക്ലയര്‍ ചെയ്തിരുന്നു. രണ്ടു വിക്കറ്റുകള്‍ ശേഷിക്കേ ഓസീസ് സ്‌കോറിനൊപ്പമെത്താന്‍ 267 റണ്‍സ് കൂടി വേണം പാകിസ്താന്.
തുടക്കത്തില്‍ രണ്ടു വിക്കറ്റുകള്‍ വീണെങ്കിലും മൂന്നാം വിക്കറ്റില്‍ ഒത്തുചേര്‍ന്ന അസ്ഹര്‍ അലി- യൂനിസ് ഖാന്‍ സഖ്യം ഇന്നിങ്‌സ് നേരെയാക്കി. ഇരുവരും ചേര്‍ന്നു മൂന്നാം വിക്കറ്റില്‍ 146 റണ്‍സ് കൂട്ടിച്ചേര്‍ത്തു. സ്‌കോര്‍ 152ല്‍ നില്‍ക്കേ 71 റണ്‍സ് നേടിയ അസ്ഹര്‍ അലി റണ്‍ ഔട്ടായതോടെ പാക് നിരയുടെ നാശവും തുടങ്ങി.
ടെസ്റ്റിലെ 34ാം ശതകം കുറിച്ച യൂനിസ് ഖാന്‍ ഓസീസ് മണ്ണില്‍ നേടുന്ന ആദ്യ സെഞ്ച്വറിയാണിത്. കളി നിര്‍ത്തുമ്പോള്‍ യൂനിസിനൊപ്പം അഞ്ചു റണ്‍സുമായി യാസിര്‍ ഷായാണ് ക്രീസില്‍. ഓസീസിനു വേണ്ടി നതാന്‍ ലിയോണ്‍ മൂന്നും ഹേസ്‌ലെവുഡ് രണ്ടും വിക്കറ്റുകള്‍ വീഴ്ത്തി.