തലശ്ശേരി: ഉത്സവസ്ഥലത്ത് കൊടി കെട്ടുന്നതുമായി ബന്ധപ്പെട്ടുണ്ടായ തര്‍ക്കത്തിനിടെ പൊലിസിനു നേരേ ആക്രമണത്തി നു ശ്രമിച്ച രണ്ടു ബി.ജെ.പി പ്രവര്‍ത്തകരെ ആയുധങ്ങളുമായി പിടികൂടി. മേലൂര്‍ ശിവശക്തിയില്‍ സുബിനേഷ്(34), ദ്വാരകയില്‍ ദേവരാജ്(43) എന്നിവരാണ് അറസ്റ്റിലായത്. ഇവരില്‍ നിന്നു കൊടുവാള്‍, വാള്‍, ഇരുമ്പ് ദണ്ഡ് എന്നിവ കണ്ടെടുത്തു. വെള്ളിയാഴ്ച രാത്രി 11.30ഓടെ മേലൂര്‍ മുച്ചിലോട്ട് ക്ഷേത്രപരിസരത്ത് സി.പി.എം-ബി.ജെ.പി പ്രവര്‍ത്തകര്‍ തമ്മില്‍ തര്‍ക്കമുണ്ടായ വിവരമറിഞ്ഞ് ധര്‍മടം എസ്.ഐ പി നളിനാക്ഷന്റെ നേതൃത്വത്തില്‍ പൊലിസ് എത്തിയപ്പോഴാണ് ആയുധങ്ങളുമായി ബി.ജെ.പി പ്രവര്‍ത്തകര്‍ അക്രമശ്രമം നടത്തിയത്. മല്‍പിടുത്തത്തിലൂടെയാണു പ്രതികളെ കീഴടക്കിയതെന്നു പൊലിസ് പറഞ്ഞു. ഒരാള്‍ ഓടി രക്ഷപ്പെട്ടു. ഡിസംബര്‍ 21നു മേലൂര്‍ മമ്മാക്കുന്ന് പാലത്തിനു സമീപം സ്റ്റീല്‍ ബോംബുകളും ബോംബ് നിര്‍മാണ സാമഗ്രികളും കണ്ടെത്തിയിരുന്നു. പിടിയിലായ സുബിനേഷ് ഈ കേസില്‍ പ്രതിയാണെന്നു പൊലിസ് പറഞ്ഞു. പ്രതികളെ കോടതി റിമാന്‍ഡ് ചെയ്തു.