തേഞ്ഞിപ്പലം: കാലിക്കറ്റ് സര്‍വകലാശാലാ ക്യാംപസില്‍ നിര്‍മിച്ച ടേക്ക് എ ബ്രേക്ക് സമുച്ചയം അടഞ്ഞുതന്നെ കിടക്കുന്നു. സര്‍വകലാശാലാ ക്യാംപസില്‍ കടക്കാട്ടുപാറയിലേക്കുള്ള റോഡ് ജംങ്ഷനിലാണ് യാത്രക്കാരുടെ ഇടവേളകള്‍ സുന്ദരമാക്കാന്‍ ടേക്ക് എ ബ്രേക്ക് ആറു മാസം മുമ്പ് നിര്‍മാണം പൂര്‍ത്തീകരിച്ച് മുഖ്യമന്ത്രിയായിരുന്ന ഉമ്മന്‍ ചാണ്ടി ഉദ്ഘാടനം ചെയ്തത്. ടൂറിസം വകുപ്പ് 46 ലക്ഷം രൂപ ചെലവിലാണ് ടേക്ക് എ ബ്രേക്ക് സമുച്ചയം ഒരുക്കിയത്. ദേശീയപാതില്‍ നിന്ന് 13 മീറ്റര്‍ മാറിയാണ് ടേക്ക് എ ബ്രേക്ക് സ്ഥിതി ചെയ്യുന്നത്.
പുരുഷന്‍മാര്‍ക്കും സ്ത്രീകള്‍ക്കും ശുചിമുറികളും വിശ്രമ കേന്ദ്രവും ഭക്ഷണ ശാല, എ.ടി.എം കൗണ്ടര്‍ സൗകര്യം, വാഹനങ്ങള്‍ക്കുള്ള പാര്‍ക്കിംഗ് സൗകര്യം എന്നിവ ഉപയോഗിക്കാനാകാതെ അടഞ്ഞു കിടക്കുകയാണ്. കാലികള്‍ക്കും തെരുവ് നായ്ക്കള്‍ക്കും വഴിയോര കച്ചവടക്കാര്‍ക്കുമാണ് ടേക്ക് എ ബ്രേക്ക് ഇപ്പോള്‍ പ്രയോജനപ്പെടുന്നത്. വൈദ്യുതിയില്ലാത്തതാണ് അടഞ്ഞു കിടക്കാന്‍ കാരണം. സര്‍വകലാശാല തന്നെയാണ് ഫ്യൂസ് ഊരി ടേക്ക് എ ബ്രേക്ക് പൂട്ടിച്ചത്. മുഖ്യമന്ത്രി ഉമ്മന്‍ ചാണ്ടി ഉദ്ഘാടനം ചെയ്ത് ദിവസങ്ങള്‍ക്കകമായിരുന്ന സര്‍വകലാശാലയുടെ നടപടി. ടേക്ക് എ ബ്രേക്ക് അടഞ്ഞുകിടക്കുന്നത് കാരണം വാടക ഇനത്തില്‍ ലക്ഷങ്ങളുടെ നഷ്ടം സര്‍വകലാശാലക്കുണ്ട്.