മണ്ണഞ്ചേരി :ഓമനപ്പുഴയിലെ വീടുകയറി ആക്രമണം നടത്തിയ പ്രതികള്‍ അറസ്റ്റില്‍. മാരാരിക്കുളം തെക്ക് പഞ്ചായത്തില്‍ 15 -ാം വാര്‍ഡില്‍ കല്ലുപുരയ്ക്കല്‍ ബിനാംസിയുടെ മക്കള്‍ ബിബിന്‍(27),വിന്‍സ്(22) എന്നിവരെയാണ് മണ്ണഞ്ചേരി പൊലീസ് അറസ്റ്റുചെയ്തത്.
കഴിഞ്ഞ ബുധനാഴ്ച രാത്രി 11.30 നായിരുന്നു സംഭവം. പ്രതികളുടെ സമീപവാസിയായ കാക്കരിയില്‍ ജെയിംസിന്റെ വീട്ടില്‍ കയറിയായിരുന്നു ആക്രമണം.
സംഭവത്തില്‍ മൂന്നുപേര്‍ക്ക് പരിക്കേറ്റിരുന്നു. ജെയിംസിന്റെ ഭാര്യ പൊന്നമ്മ(56),സ്വപ്ന(30),സ്വപ്നയുടെ പത്തുവയസുകാരിയായ മകള്‍ എന്നിവര്‍ക്കാണ് പരുക്കേറ്റത്. ഇവര്‍ ചെട്ടികാട് കമ്മ്യൂണിറ്റി സെന്ററില്‍ ചികിത്സയിലാണ്.
സ്വപ്നയുടെ ഭര്‍ത്താവും പ്രതികളും തമ്മിലുള്ള തര്‍ക്കമാണ് അക്രമത്തിന് കാരണമെന്ന് മണ്ണഞ്ചേരി എസ്.ഐ കെ.രാജന്‍ബാബു പറഞ്ഞു. സംഭവത്തെതുടര്‍ന്ന് ഒളിവിലായ പ്രതികളെ കാട്ടൂരിലെ താമസമില്ലാത്ത വീടിനുള്ളില്‍ നിന്നും ഇന്നലെ സന്ധ്യയോടെ പൊലീസ് പിടികൂടുകയായിരുന്നു.പ്രതികളെ ഇന്ന് കോടതിയില്‍ ഹാജരാക്കും.