തൃശ്ശൂര്‍: പാമ്പാട് നെഹ്‌റു കോളജില്‍ വിദ്യാര്‍ഥിയായ ജിഷ്ണുവിന്റെ മരണത്തില്‍ പൊലിസ് തയ്യാറാക്കിയ എഫ്.ഐ.ആറിനെതിരേ ജിഷ്ണുവിന്റെ ബന്ധുക്കള്‍. നിലവിലെ എഫ്.ഐ.ആര്‍ ദുര്‍ബലമെന്നാണ് ബന്ധുക്കള്‍ ആരോപിക്കുന്നത്. പ്രതികള്‍ക്ക് രക്ഷപ്പെടാന്‍ ഇതിലൂടെ സാധിക്കുമെന്നും അവര്‍ പറഞ്ഞു. പ്രതികളുടെ മൊഴിയുടെ അടിസ്ഥാനത്തിലാണ് പൊലിസ് എഫ്.ഐ.ആര്‍ തയ്യാറാക്കിയിരിക്കുന്നതെന്നും അമ്മാവനായ ശ്രീജിത്ത് പറഞ്ഞു.

സംഭവത്തിനു പിന്നില്‍ ആരോപണവിധേയരായവരെ സസ്‌പെന്‍ഡ് ചെയ്‌തെങ്കിലും പ്രതിഷേധം തുടരുമെന്ന് വിദ്യാര്‍ഥികള്‍ അറിയിച്ചു. ഇവര്‍ക്കെതിരേ കേസെടുക്കുന്നത് വരെ പ്രതിഷേധം തുടരുമെന്ന് വിദ്യാര്‍ഥികള്‍ അറിയിച്ചു. ആരോപണവിധേയരെ സസ്‌പെന്‍ഡ് ചെയ്ത നടപടി മാനേജ്‌മെന്റിന്റെ കണ്ണില്‍ പൊടിയിടല്‍ മാത്രമാണ്. മാനേജ്‌മെന്റ് നിയോഗിച്ച അന്വേഷണ കമ്മിഷന്റെ റിപ്പോര്‍ട്ടിനെ തുടര്‍ന്നാണ് ഇവരെ സസ്‌പെന്‍ഡ് ചെയ്യുന്നതെന്നാണ് കോളജ് അധികൃതര്‍ അറിയിച്ചത്. ഇതില്‍ നിന്നും വ്യക്തമാണ് ഇവരുടെ പീഡനം മൂലമാണ് ജിഷ്ണു ജീവനൊടുക്കിയതെന്ന് വ്യക്തമാകുന്നതായും വിദ്യാര്‍ഥികള്‍ പറയുന്നു. ഈ സാഹചര്യത്തിലാണ് ഇവര്‍ക്കെതിരേ നിയമപരമായ നടപടി സ്വീകരിക്കുന്നത് വരെ പ്രതിഷേധം തുടരാണ് വിദ്യാര്‍ഥികളുടെ തീരുമാനം.