ബാലരാമപുരം: ബാലരാമപുരത്തെ പഴയ മിഡില്‍ സ്‌കൂള്‍ ശതാബ്ദിയുടെ നിറവില്‍. എച്ച്.എസ് ബാലരാമപുരം എന്ന് ഇപ്പോള്‍ അറിയപ്പെടുന്ന ഈ സരസ്വതി ക്ഷേത്രം 1917 ജൂണിലാണ് പ്ലാവിളാകത്ത് പുത്തന്‍വീട്ടില്‍ ഉമ്മിണിനാടാര്‍ സ്ഥാപിച്ചത്. നവശക്തി ദിനപത്രത്തിന്റെ പത്രാധിപര്‍ രാമന്‍പിളളയുടെ സഹായ സഹകരണങ്ങളും ഈ വിദ്യാഭ്യാസ സ്ഥാപനത്തിനുണ്ടായിരുന്നു.
കെ.വി.രാമകൃഷ്ണനായിരുന്നു ആദ്യ പ്രഥമാധ്യാപകന്‍. തങ്കപ്പന്‍പിളള ആദ്യ വിദ്യാര്‍ഥിയും. ആകെ 14 വിദ്യാര്‍ഥികള്‍.
1947-ല്‍ ഹിന്ദു മിഡില്‍ സ്‌കൂള്‍ എന്ന് നാമകരണം ചെയ്യപ്പെട്ട വിദ്യാലയം അതേ വര്‍ഷം ഹൈസ്‌കൂള്‍ ബാലരാമപുരം എന്ന നിലയിലേയ്ക്ക് അപ്‌ഗ്രേഡ് ചെയ്യുകയായിരുന്നു.
മുന്‍മന്ത്രി ബി.ജെ.തങ്കപ്പന്‍ , ഗുജറാത്തിലെ മുന്‍ അഡീഷണല്‍ ഡി.ജി.പി ആര്‍.ബി.ശ്രീകുമാര്‍ എന്നിങ്ങനെ സമൂഹത്തിന്റെ വിവിധ തലങ്ങളിലുളള പ്രശസ്തരായ പലരും ഈ വിദ്യാലയ മുത്തശ്ശിയുടെ കുട്ടികളാണ്. നൂറ് വയസ് പൂര്‍ത്തിയാക്കുന്ന സാഹചര്യത്തില്‍ ഒരു വര്‍ഷം നീണ്ടുനില്‍ക്കുന്ന പരിപാടികളാണ് ആലോചിക്കുന്നതെന്ന് ഹെഡ്മിസ്ട്രസ് എന്‍.എസ്.ബെറ്റി പറഞ്ഞു. ആഘോഷ പരിപാടികളുടെ നടത്തിപ്പുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യുവാന്‍ കഴിഞ്ഞദിവസം സ്‌കൂള്‍ ഓഡിറ്റോറിയത്തില്‍ യോഗം ചേര്‍ന്നിരുന്നതായി മാനേജര്‍ ആര്‍.ചന്ദ്ര ബാബു അറിയിച്ചു.