ചേര്‍ത്തല: മണ്‍സൂണ്‍ ആരംഭിച്ചതോടെ തീരകടലില്‍ മല്‍സ്യബന്ധനം നടത്തുന്ന മല്‍സ്യതൊഴിലാളികള്‍ അപകടങ്ങളില്‍പെടാന്‍ സാധ്യത കൂടിയതിനാല്‍ ദുരന്തം ഒഴിവാക്കാന്‍ പത്തു കിലോമീറ്റര്‍ കടല്‍പരിധി ഇടവിട്ട് കോസ്റ്റ് ഗാര്‍ഡിന്റെ സാന്നിധ്യം ഉറപ്പുവരുത്തണമെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷന്‍ ആവശ്യപ്പെട്ടു.
രക്ഷാപ്രവര്‍ത്തകരുടെ സാന്നിദ്ധ്യം തീരക്കടലില്‍ ഉണ്ടായിരുന്നെങ്കില്‍ കഴിഞ്ഞ ദിവസം പുന്നപ്രയില്‍ ഒഴുക്കില്‍പ്പെട്ട് പൊന്തുവള്ളത്തിലെ മല്‍സ്യതൊഴിലാളി അപകടത്തില്‍പ്പെടുകയില്ലായിരുന്നുവെന്ന് യോഗം വിലയിരുത്തി.
ജില്ലയുടെ തീരക്കടലില്‍ രക്ഷാപ്രവര്‍ത്തനത്തിന് കോടികള്‍ ചെലവഴിച്ച് വാങ്ങിയ രണ്ട് ഇന്റര്‍ഡെപ്റ്റര്‍ ബോട്ടുകള്‍ ഉണ്ടെങ്കിലും പ്രവര്‍ത്തന രഹിതമായി തൃക്കുന്നപുഴ കായലില്‍ കെട്ടിയിട്ടിരിക്കുകയാണ്.
വീഴ്ചവരുത്തിയവര്‍ക്കെതിരേ നടപടിയെടുക്കണമെന്ന് ഫെഡറേഷന്‍ ഭാരവാഹികളായ ജാക്‌സണ്‍ പൊള്ളയില്‍, ആശ്രയം രാജു, ആന്റണി ആറാട്ടുവഴി, സിബി ഡാനിയേല്‍ ആവശ്യപ്പെട്ടു.