കണ്ണൂര്‍: വേദി അഞ്ചില്‍ നടന്ന ഹയര്‍ സെക്കന്‍ഡറി വിഭാഗം പെണ്‍കുട്ടികളുടെ തുള്ളല്‍മത്സരങ്ങള്‍ മികച്ചനിലവാരം പുലര്‍ത്തി. എല്ലാ മത്സരാര്‍ഥികള്‍ക്കും എ ഗ്രേഡും ലഭിച്ചു. മികച്ച അഭിപ്രായമായിരുന്നു വിധികര്‍ത്താക്കളും രേഖപ്പെടുത്തിയത്. പങ്കെടുത്ത കുട്ടികളില്‍ ഭൂരിഭാഗവും അവതരിപ്പിച്ച കഥ ഒന്നായിരുന്നവെങ്കിലും അവതരണത്തില്‍ വ്യത്യസ്തത പുലര്‍ത്താന്‍ സാധിച്ചു. ബഗവധം, സന്താനഗോപാലം എന്നിവയായിരുന്നു പ്രധാനമായും മത്സരാര്‍ഥികള്‍ അരങ്ങില്‍ അവതരിപ്പിച്ചത്.

എങ്കിലും വേദിയില്‍ വ്യത്യസ്തമായത് കൊല്ലം കടക്കല്‍ ഗവ.എച്ച്.എസ്.എസിലെ വേദിക അവതരിപ്പിച്ച പറയന്‍തുള്ളലായിരുന്നു. പുളുന്തിമോക്ഷമാണ് വേദിക അവതരിപ്പിച്ചത്.

പങ്കെടുത്ത 20 പേരില്‍ മറ്റ് 19 പേരും ഓട്ടന്‍ തുള്ളലായിരുന്നു അവതരിപ്പിച്ചത്.

പുതുമയാര്‍ന്ന പ്രമേയങ്ങള്‍ പ്രതീക്ഷിച്ച് തുള്ളല്‍ കാണനെത്തിയവര്‍ക്ക് നിരാശയായിരുന്നു ഫലം. പതിവ് രീതികള്‍ക്കുള്ളില്‍നിന്നാണ് എല്ലാ മത്സരാര്‍ഥികളും കഥപറഞ്ഞത്. പുരാണകഥകള്‍ തന്നെയായിരുന്നു എല്ലാവരും അവതരിപ്പിച്ചതും.