പാലക്കാട്: ആറ് മാസ കാലയളവില്‍ 4782 കോടി വായ്പയായി വിതരണം ചെയ്തതായി നടപ്പു സാമ്പത്തിക വര്‍ഷത്തെ രണ്ടാമത്തെ ജില്ലാതല ബാങ്കിങ് അവലോകന യോഗം വിലയിരുത്തി. ഇതില്‍ കാര്‍ഷിക മേഖലയ്ക്ക് 1940 കോടിയും വ്യവസായിക മേഖലയ്ക്ക് 548 കോടിയും മറ്റ് മുന്‍ഗണനാ മേഖലകള്‍ക്ക് 1053 കോടിയും വായ്പ നല്‍കി. ജില്ലയില്‍ മുന്‍ഗണനാ വായ്പാ വിതരണത്തിനായി 3541 കോടി രൂപ നല്‍കി. 33 ശതമാനം പ്രവര്‍ത്തനം കൈവരിച്ചു. വായ്പാ നിക്ഷേപാനുപാതം 60 ശതമാനം ആയി.
ഈ കാലയളവില്‍ 64 കോടി വിദ്യാഭ്യാസ വായ്പ നല്‍കി. ബാങ്കുകളില്‍ ലഭിച്ച 2508 വിദ്യാഭ്യാസ വായ്പാ അപേക്ഷകളില്‍ 2493 അപേക്ഷകള്‍ക്ക് വായ്പ നല്‍കി. 1336 സ്വയം സഹായ സംഘങ്ങള്‍ക്ക് 134 കോടി വായ്പ നിലനില്‍ക്കുന്നത് യോഗം നിരീക്ഷിച്ചു. ജില്ലയിലെ കര്‍ഷകര്‍ക്ക് കഴിഞ്ഞ മൂന്ന് മാസ കാലയളവില്‍ കിസാന്‍ ക്രെഡിറ്റ് കാര്‍ഡ് മുഖേന 286 കോടി അനുവദിച്ചു. മുദ്രാലോണ്‍ വിഭാഗത്തില്‍ 43 കോടി രൂപ 2016 ജൂലൈ, ഓഗസ്റ്റ് , സെപ്റ്റംബര്‍ മാസങ്ങളില്‍ അനുവദിച്ചു. യോഗം എ.ഡി.എം എസ്. വിജയന്‍ ഉദ്ഘാടനം ചെയ്തു. നോട്ട് അസാധുവാക്കലിന്റെ ഭാഗമായി ബാങ്കുകളുടെ നടപടികള്‍ വിലയിരുത്തണമെന്നും വിദ്യാഭ്യാസ വായ്പകള്‍ ഉദാര കാഴ്ചപ്പാടോടെ നല്‍കണമെന്നും എ.ഡി.എം പറഞ്ഞു.
ചെറുകിട വ്യവസായ മേഖലയ്ക്കുള്ള മുദ്രാ ലോണുകളും കൂടുതലായി അനുവദിക്കണമെന്നും ആവശ്യപ്പെട്ടു.