മുവാറ്റുപുഴ: മാധ്യമ പ്രവര്‍ത്തനം സമൂഹത്തില്‍ നടക്കുന്ന കാര്യങ്ങളെ പ്രതിഫലിപ്പിക്കുന്നതാകണമെന്ന് പ്രമുഖ മാധ്യമ പ്രവര്‍ത്തകനും ഏഷ്യന്‍ കോളജ് ഓഫ് ജേര്‍ണലിസത്തിന്റെ ചെയര്‍മാനുമായ ശശികുമാര്‍ അഭിപ്രായപ്പെട്ടു. മുവാറ്റുപുഴ നിര്‍മല കോളജില്‍ നടന്ന മോണ്‍. തോമസ് നെടുങ്കല്ലേല്‍ അനുസ്മരണത്തില്‍ 'മാധ്യമങ്ങളും സമൂഹവും' എന്ന വിഷയത്തെക്കുറിച്ച് പ്രഭാഷണം നടത്തുകയായിരുന്നു അദ്ദേഹം.
ജനങ്ങള്‍ക്ക് ഇഷ്ടമുള്ളത് നല്‍കുക എന്നതല്ല മാധ്യമ ധര്‍മ്മം. മറിച്ച് ജനങ്ങളെ അറിവുള്ളവരാക്കുകയും പ്രബുദ്ധരാക്കുകയും ശാക്തീകരിക്കുകയും ചെയ്യുക എന്നതാണ്. എന്നാല്‍ ഇന്ന് മാധ്യമങ്ങള്‍ അത് ചെയ്യുന്നില്ലെന്നും അദ്ദഹം കൂട്ടിച്ചേര്‍ത്തു.
യോഗത്തില്‍ കോളജ് മാനേജര്‍ മോണ്‍. ജോര്‍ജ്ജ് ഒലിയപ്പുറം അധ്യക്ഷത വഹിച്ചു. പ്രിന്‍സിപ്പല്‍ ഡോ. ടി.എം. ജോസഫ്, കണ്‍വീനര്‍ ഫാ. ഫ്രാന്‍സീസ് മൈക്കിള്‍ എന്നിവര്‍ സംസാരിച്ചു.