'
പള്ളിക്കല്‍: സോഷ്യല്‍ മീഡിയയുടെ ദുരുപയോഗം യുവാക്കളെ വഴി തെറ്റിക്കുന്നുവെന്ന് എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ പറഞ്ഞു. ചെട്ട്യാര്‍മാട് മഹല്ല് മജ്‌ലിസുന്നൂര്‍ രണ്ടാം വാര്‍ഷിക സമാപന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ആവശ്യത്തിലധികം സമ്പത്തും സൗകര്യങ്ങളുമുണ്ടായിട്ടും സ്വന്തം മക്കള്‍ മാതാപിതാക്കളെ വൃദ്ധസദനത്തില്‍ തള്ളുന്ന കാലത്ത് അന്യന്റെ മാതാപിതാക്കളെ സംരക്ഷിക്കുന്നതുള്‍പ്പെടെ ജീവ കാരുണ്യ പ്രവര്‍ത്തനത്തിന് നേതൃത്വം നല്‍കുന്ന എസ്.കെ.എസ്.എസ്.എഫിന്റെ പ്രവര്‍ത്തനം മാതൃകാപരമാണെന്നും തങ്ങള്‍ പറഞ്ഞു. എസ്.കെ.എസ്.എസ്.എഫിന്റെ കീഴിലുള്ള സഹചാരിയുടെ പ്രവര്‍ത്തനം എല്ലാ മഹല്ലുകളിലും സജീവമാക്കണമെന്നും തങ്ങള്‍ ആവശ്യപ്പെട്ടു.
വാര്‍ഷികത്തിന്റെ ആദ്യ ദിവസം നടന്ന സമ്മേളനം സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയതു. രണ്ട് ദിവസങ്ങളിലായി നടന്ന സമ്മേളനത്തില്‍ പി.സി മുഹമ്മദ് ഹാജി, കുഞ്ഞിമുഹമ്മദ് ഹാജി എന്നിവര്‍ അധ്യക്ഷരായി. അന്‍വര്‍ മുഹ്‌യുദ്ദീന്‍ ഹുദവി ആലുവ, റഹ്മത്തുല്ലാഹ് ഖാസിമി മൂത്തേടം മുഖ്യ പ്രഭാഷണം നടത്തി. മജ്‌ലിസുന്നൂറിന് അബ്ദുല്‍ ജബ്ബാര്‍ ദാരിമി, സയ്യിദ് മുബശ്ശിര്‍ ഹുദവി നേതൃത്വം നല്‍കി. ദുആ മജ്‌ലിസിന് ശൈഖുനാ ഉമ്മര്‍ ഉസ്താദ് തനിയാമ്പുറം നേതൃത്വം നല്‍കി. അബ്ദല്‍ നാസര്‍ ദാരിമി, അസീസ് ദാരിമി, സൈനുല്‍ ആബിദീന്‍ തങ്ങള്‍, കോയമോന്‍തങ്ങള്‍, പി.സി ലത്തീഫ്, സി.കെ അബ്ദല്‍ ഖാദര്‍ സംസാരിച്ചു.