പൂച്ചാക്കല്‍: അന്യസംസ്ഥാനക്കാര്‍ വേമ്പനാട്ടുകായലില്‍ അനധികൃത മല്‍സ്യബന്ധനം നടത്തിയ സംഭവത്തില്‍ പ്രശ്‌നപരിഹാരമായി. പ്രദേശത്ത് ഇനി മല്‍സ്യബന്ധനത്തിന് എത്തില്ലെന്ന് ഇതര സംസ്ഥാനക്കാരില്‍ നിന്നും എഴുതിവാങ്ങിച്ച ശേഷം മല്‍സ്യബന്ധന ഉപകരണങ്ങള്‍ വിട്ടുനല്‍കി.
15000 രൂപ പിഴയും ഈടാക്കി. കഴിഞ്ഞദിവസം വേമ്പനാട്ടുകായലില്‍ തവണക്കടവ്, വടക്കുംകര ഭാഗങ്ങളില്‍ മല്‍സ്യബന്ധനം നടത്തിയതിന് മൈസൂരു സ്വദേശികളായ 24 പേരെ വലകള്‍,കുട്ടവള്ളം അടക്കമുള്ള മല്‍സ്യബന്ധന ഉപകരണങ്ങളുമായി തേവര്‍വട്ടം മല്‍സ്യഭവന്‍ അധികൃതര്‍ പിടികൂടിയിരുന്നു. എന്നാല്‍ മല്‍സ്യവകുപ്പ് ഉപഡയറക്ടറേറ്റില്‍ നടന്ന വാദം കേള്‍ക്കലില്‍ ചെറിയ തുക പിഴ ഈടാക്കി മല്‍സ്യബന്ധന ഉപകരണങ്ങള്‍ വിട്ടു നല്‍കുന്നതിനും പ്രാദേശിക മല്‍സ്യത്തൊഴിലാളികള്‍ സഹകരിക്കുകയാണെങ്കില്‍ മല്‍സ്യബന്ധനം തുടരുന്നതിനും നിര്‍ദേശിച്ചിരുന്നു.
ഇത് പ്രാദേശിക മല്‍സ്യത്തൊഴിലാളികള്‍ക്കിടയില്‍ പ്രതിഷേധമുണ്ടാക്കുകയും മല്‍സ്യബന്ധന ഉപകരണങ്ങള്‍ ഏറ്റെടുക്കാനെത്തിയ ഇതരസംസ്ഥാനക്കാരെ തടയുകയും ചെയ്തിരുന്നു. ഇത് സംബന്ധിച്ച് ഇന്നലെ തേവര്‍വട്ടം മല്‍സ്യഭവനില്‍ ഉദ്യോഗസ്ഥരുടെയും ജനപ്രതിനിധികളുടെയും മല്‍സ്യത്തൊഴിലാളി പ്രതിനിധികളുടെയും യോഗം ചേര്‍ന്നെങ്കിലും ഇതരസംസ്ഥാനക്കാരെ ഇവിടെ മല്‍സ്യബന്ധനത്തിന് അനുവദിക്കില്ലെന്നും അങ്ങനെ ചെയ്താല്‍ തങ്ങളുടെ കുടുംബം പട്ടിണിയാകുമെന്നും കൂട്ടമായെത്തിയ പ്രാദേശിക മല്‍സ്യത്തൊഴിലാളികള്‍ പറഞ്ഞു.
ഇതരസംസ്ഥാനക്കാര്‍ ഇവിടെ മല്‍സ്യബന്ധനം നടത്തില്ലെന്ന് ഉറപ്പു ലഭിച്ചാല്‍ മാത്രമെ മല്‍സ്യബന്ധന ഉപകരണങ്ങള്‍ വിട്ടുനല്‍കാന്‍ അനുവദിക്കുകയുള്ളെന്നും പറഞ്ഞു. ചര്‍ച്ചകള്‍ക്കൊടുവില്‍ ഇതരസംസ്ഥാനക്കാര്‍ അത് അംഗീകരിക്കുന്നതിനും മല്‍സ്യവകുപ്പില്‍ 15000 രൂപ പിഴ അടക്കുന്നതിനും തയാറായി.ഇതരസംസ്ഥാനക്കാര്‍ കുടുംബമായി പ്രത്യേക വാഹനത്തില്‍ കരമാര്‍ഗമാണ് മല്‍സ്യബന്ധന ഉപകരണങ്ങളുമായി പോയത്.തേവര്‍വട്ടം മല്‍സ്യഭവന്‍ ഇന്‍സ്‌പെക്ടര്‍ അനുരാജ്,തൈക്കാട്ടുശേരി ബ്ലോക് പഞ്ചായത്ത് അംഗങ്ങളായ പി.ഡി.സബീഷ്, രതി നാരായണന്‍,ഗ്രാമപഞ്ചായത്ത് അംഗം എന്‍.പി.പ്രദീപ്, ധീവരസഭ ജില്ലാ സെക്രട്ടറി എന്‍.ആര്‍. ഷാജി,ധീവരയുവജനസഭ ചേര്‍ത്തല താലൂക്ക് പ്രസിഡന്റ് സുരേഷ് കരിയില്‍, കെ.എസ്. രാജേന്ദ്രന്‍,പവിത്രന്‍ പുത്തന്‍വെളി, ഡി.ഗോപി തുടങ്ങിയവര്‍ ചര്‍ച്ചയില്‍ പങ്കെടുത്തു.