തിരുവനന്തപുരം: മന്ത്രിസഭാ തീരുമാനങ്ങള്‍ വിവരാവകാശ നിയമപ്രകാരം പുറത്ത് വിടാനാകില്ലെന്ന് മുഖ്യമന്ത്രി പിണറായി വിജയന്‍. എല്ലാ വിവരങ്ങളും ഉടനടി പുറത്ത് വിടുകയാണെങ്കില്‍ കാര്യങ്ങള്‍ ലക്ഷ്യപ്രാപ്തിയില്‍ എത്തുന്നതിന് തടസമുണ്ടാകും. അത് നടപ്പാക്കാനാകാതെ വന്നേക്കും. അതിനാല്‍ ചിലത് നടപ്പിലാക്കിയ ശേഷമെ പുറത്തുവിടാന്‍ കഴിയുകയുള്ളുവെന്നും മുഖ്യമന്ത്രി വ്യക്തമാക്കി.

വിവരാവകാശ നിയമം വ്യക്തിപരമായി ദുരുപയോഗിക്കുന്നവരെ തിരിച്ചറിയണം. അതേസമയം ദുരുപയോഗം മറയാക്കി വിവരം നല്‍കാതിരിക്കുന്ന സ്ഥിതിയും ഉണ്ടാവരുതെന്നും അദ്ദേഹം പറഞ്ഞു.

സംസ്ഥാനത്ത് അഴിമതി അര്‍ബുദം പോലെ പടരുകയാണ്. വികസനം ലക്ഷ്യപ്രാപ്തിയില്‍ എത്താതെ മറ്റുവഴികളിലൂടെ ചോര്‍ന്നു പോകുകയാണ്. അഴിമതിയില്ലാതെയുളള ഭരണത്തിനായി ശുദ്ധീകരിക്കല്‍ നടപടികള്‍ തുടരുകയാണെന്നും അദ്ദേഹം കൂട്ടിച്ചേർത്തു,