കോഴിക്കോട്: ഈ വര്‍ഷത്തെ ഔദ്യോഗിക സംസ്ഥാന ബോഡി ബില്‍ഡിങ് ചാംപ്യന്‍ഷിപ്പ് ഇന്നു വൈകിട്ട് കോഴിക്കോട് ഇന്‍ഡോര്‍ സ്റ്റേഡിയത്തില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. പുരുഷന്മാര്‍ക്കായുള്ള മിസ്റ്റര്‍ കേരള, സ്‌പോര്‍ട്‌സ് ഫിസിക്, മോഡല്‍ ഫിസിക്, സ്ത്രീകള്‍ക്കായുള്ള മിസ് ഫിറ്റ്‌നസ്, കേരള മത്സരത്തില്‍ മോഡല്‍ ഫിസിക്, സ്‌പോര്‍ട്‌സ് ഫിസിക് എന്നിങ്ങനെയുള്ള മത്സരങ്ങളും നടക്കും. കേരള സ്‌പോര്‍ട്‌സ് കൗണ്‍സിലിന്റെയും കേരള ഒളിംപിക് അസോസിയേഷന്റെയും അംഗീകാരത്തോടെ നടക്കുന്ന ചാംപ്യന്‍ഷിപ്പില്‍ ജില്ലകളില്‍ നിന്ന് 300 പുരുഷ-വനിതാ മത്സരാര്‍ഥികള്‍ പങ്കെടുക്കും. വിജയികള്‍ മാര്‍ച്ചില്‍ ഹരിയാനയില്‍ നടക്കുന്ന മിസ്റ്റര്‍ ഇന്ത്യ, മിസ് ഫിറ്റ്‌നസ് ഇന്ത്യ മത്സരത്തില്‍ കേരളത്തെ പ്രതിനിധീകരിക്കും. ലോക സില്‍വര്‍ മെഡലിസ്റ്റ് ജേതാവായ സോണിയ മിത്രയുടെ സ്‌പോര്‍ട്‌സ് ഫിസിക് പ്രകടനവുമുണ്ടാകും. എം.കെ രാഘവന്‍ എം.പി ഉദ്ഘാടനം ചെയ്യും. ടി.വി പോളി മുഖ്യപ്രഭാഷണം നടത്തും. വാര്‍ത്താ സമ്മേളനത്തില്‍ വി.കെ അനില്‍കുമാര്‍, വി.എം ഷബീര്‍, ലത്തീഫ് നഹ, മുന്‍ഫര്‍ കക്കോടി പങ്കെടുത്തു.