കോഴിക്കോട്: ജില്ലയില്‍ വിദ്യാര്‍ഥികളെ കേന്ദ്രീകരിച്ചുള്ള മയക്കുമരുന്ന്-ലഹരി ഉപയോഗം വര്‍ധിച്ചു വരുന്ന സാഹചര്യത്തില്‍ ബോധവല്‍ക്കരണത്തിനായി സംസ്ഥാന എക്‌സൈസ് കമ്മിഷണര്‍ ഋഷിരാജ് സിങ്ങ് എത്തുന്നു.
ജില്ലയിലെ കുറ്റിക്കാട്ടൂര്‍ എ.ഡബ്ല്യു.എച്ച് കോളജ്, കൂടരഞ്ഞി ഹയര്‍ സെക്കന്‍ഡറി സ്‌കൂള്‍, ബാലുശ്ശേരി അവിടനല്ലൂര്‍ ഹയര്‍ സെക്കന്‍ഡറി സ്‌കൂള്‍ എന്നിവിടങ്ങളിലെ ബോധവല്‍ക്കരണ പരിപാടികള്‍ക്കു അദ്ദേഹം നേതൃത്വം നല്‍കും.
നിരോധിത പുകയില ഉല്‍പ്പന്നങ്ങള്‍, കഞ്ചാവ്, അനധികൃത മദ്യവില്‍പ്പന തുടങ്ങിയവയുടെ വിപണനവും കടത്തുമായി ബന്ധപ്പെട്ട് ജില്ലയില്‍ റിപ്പോര്‍ട്ട് ചെയ്യപ്പെടുന്ന കേസുകളുട എണ്ണം അനുദിനം വര്‍ധിക്കുന്നതായാണ് കണക്കുകള്‍ വ്യക്തമാക്കുന്നത്. പുതിയ വര്‍ഷം ആരംഭിച്ച് ദിവസങ്ങള്‍ പിന്നിട്ടപ്പോള്‍ തന്നെ പിടിച്ചെടുത്ത കഞ്ചാവിന്റെ അളവിലും കഴിഞ്ഞ വര്‍ഷത്തേക്കാള്‍ ഗണ്യമായ വര്‍ധനവുണ്ടായിട്ടുണ്ട്. വില്‍പ്പനയ്‌ക്കെത്തുന്നവര്‍ വിദ്യാര്‍ഥികളെ ലക്ഷ്യം വയ്ക്കുന്നുണ്ടെന്ന സൂചനയും ലഭിച്ചിരുന്നു.
ലഹരിക്ക് അടിമപ്പെടുന്ന വിദ്യാര്‍ഥികള്‍ക്ക് 'നമ്മുടെ ഉത്തരവാദിത്തം നമ്മുടെ മക്കള്‍' എന്ന പദ്ധതിയുടെ ഭാഗമായി കൗണ്‍സിലിങ് നല്‍കുന്ന നടപടികളുണ്ടായിരുന്നു. ഇപ്പോള്‍ സാമൂഹ്യനീതി വകുപ്പിന്റെ കീഴില്‍ പ്രിവന്റ് ഓറിയന്റേഷന്‍ പ്രവര്‍ത്തനങ്ങള്‍ക്ക് ഊന്നല്‍ നല്‍കി തിരഞ്ഞെടുത്ത സ്‌കൂളുകളില്‍ മാത്രമാണു പദ്ധതി നടപ്പാക്കുന്നത്.
ഒരു വര്‍ഷം മുന്‍പ് കോഴിക്കോട് പരിധിയിലെ എക്‌സൈസ് സംഘം താല്‍ക്കാലികമായി തുടങ്ങിയ കൗണ്‍സിലിങ് സെന്ററിനു മികച്ച കെട്ടിടം ലഭിക്കാത്തതും പ്രതിരോധ പ്രവര്‍ത്തനങ്ങള്‍ക്കു വിലങ്ങ് തടിയാകുന്നുണ്ട്. എന്നാല്‍ പുതിയങ്ങാടിയില്‍ പ്രവര്‍ത്തിച്ചിരുന്ന 'സുരക്ഷ' ലഹരി വിമോചന പുനരധിവാസ കേന്ദ്രം സൗകര്യപ്രദമായി നടക്കാവില്‍ പ്രവര്‍ത്തനം ആരംഭിച്ചത് കൂടുതല്‍ പ്രതീക്ഷ നല്‍കുന്നുണ്ടെന്ന് എക്‌സൈസ് അധികൃതര്‍ പറയുന്നു. ഗവണ്‍മെന്റ് ആശുപത്രികളിലെ മനശാസ്ത്രജ്ഞരുടെ സേവനം ഉപയോഗപ്പെടുത്തി വിമുക്തി സെന്ററുകളുടെ പ്രവര്‍ത്തനം തുടങ്ങാനും പദ്ധതിയുണ്ട്.