പനാജി: നിയമസഭാ തെരഞ്ഞെടുപ്പ് നടക്കുന്ന ഗോവയില്‍ മുന്‍മുഖ്യമന്ത്രി ഉമ്മന്‍ചാണ്ടിയും പ്രചാരണം നടത്തും. കോണ്‍ഗ്രസ് ഉപാധ്യക്ഷന്‍ രാഹുല്‍ഗാന്ധിയുടെ നിര്‍ദ്ദേശപ്രകാരമാണ് ഉമ്മന്‍ചാണ്ടി സംസ്ഥാനത്തു പ്രചാരണത്തിനെത്തുന്നത്.
വ്യാഴാഴ്ച ഗോവയിലെത്തുന്ന ഉമ്മന്‍ചാണ്ടി രണ്ടുദിവസം സംസ്ഥാനത്തുടനീളം പ്രചാരണം നടത്തും. ഗോവ പ്രദേശ് കോണ്‍ഗ്രസ് കമ്മിറ്റിയാണ് പ്രചരണ പരിപാടികള്‍ ഏകോപിപ്പിക്കുന്നത്.
പി.സി.സി തയാറാക്കുന്ന പരിപാടിയനുസരിച്ച് അദ്ദേഹം വിവിധ മണ്ഡലങ്ങളിലെ പ്രചാരണ പരിപാടികളില്‍ സംസാരിക്കും. കോണ്‍ഗ്രസ് നേതാവ് ബെന്നി ബെഹനാനും ഉമ്മന്‍ചാണ്ടിയെ അനുഗമിക്കും. അടുത്തമാസം നാലിനാണ് സംസ്ഥാനത്ത് വോട്ടെടുപ്പ്.