ന്യൂഡല്‍ഹി: സൈനികരെ അപമാനിച്ച് പ്രസ്താവന നടത്തിയ ബി.ജെ.പി എം.പി മാപ്പ് പറഞ്ഞു. രാജ്യത്തെ സൈനികര്‍ മരിക്കാന്‍ ബാധ്യതപ്പെട്ടവരാണെന്ന വിവാദ പരാമര്‍ശം നടത്തിയ നേപ്പാള്‍ സിങ്ങ് എം.പിയാണ് മാപ്പുപറഞ്ഞത്. കശ്മീരിലെ പുല്‍വാമയില്‍ സൈനിക ക്യാംപിന് നേരെ നടന്ന ആക്രമണത്തില്‍ അഞ്ച് സി.ആര്‍.പി.എഫ് ജവാന്‍മാര്‍ കൊല്ലപ്പെട്ടതിനു പിന്നാലെയാണ് നേപ്പാള്‍ സിങ് വിവാദ പരാമര്‍ശം നടത്തിയത്. സൈനികരെ അപമാനിക്കുന്ന തരത്തില്‍ പ്രസ്താവന നടത്തിയത് വിവാദമായതോടെ എം.പി മാപ്പുപറഞ്ഞ് തടിയൂരുകയായിരുന്നു.
ദിവസവും സൈനികര്‍ മരിക്കുന്നു. സൈന്യത്തില്‍ ചേര്‍ന്നാല്‍ മരിക്കേണ്ടിവരും. മറ്റു രാജ്യങ്ങളുമായുള്ള യുദ്ധത്തില്‍ സൈനികര്‍ മരിക്കാത്ത ഇന്ത്യ പോലുള്ള മറ്റു രാജ്യമുണ്ടോയെന്ന് സംശയമാണെന്നായിരുന്നു എം.പിയുടെ പരാമര്‍ശം. ഒരു ഗ്രാമത്തില്‍ ചെറിയൊരു അടിപിടിയുണ്ടായാല്‍ വരെ ഒരാള്‍ക്കെങ്കിലും പരുക്കേല്‍ക്കും. ജനങ്ങളുടെ ജീവന്‍ രക്ഷിക്കാനുള്ള ഒരു ഉപകരണവും ഇതുവരെ ഒരു രാജ്യവും വികസിപ്പിച്ചിട്ടില്ലെന്നും അദ്ദേഹം പരിഹസിച്ചിരുന്നു.
എന്നാല്‍, പ്രസ്താവന വിവാദമായതോടെയാണ് അദ്ദേഹം മാപ്പുപറഞ്ഞത്. വെടിയുണ്ട തടുക്കാനുള്ള ഉപകരണം ശാസ്ത്രജ്ഞന്‍മാര്‍ കണ്ടുപിടിക്കാന്‍ ശ്രമിക്കുന്നുണ്ടെന്നാണ് താന്‍ പറഞ്ഞതെന്ന ന്യായീകരണമാണ് അദ്ദേഹം പിന്നീട് നിരത്തിയത്.