ഫറോക്ക്: ലൈസന്‍സില്ലാതെ മത്സ്യബന്ധനം നടത്തിയ ആറു ബോട്ടുകള്‍ ബേപ്പൂര്‍ മറൈന്‍ എന്‍ഫോഴ്‌സ്‌മെന്റ് പിടികൂടി.ഇന്നലെ ഉച്ചയ്ക്ക് ഒന്നോടെ കോഴിക്കോട് പുതിയാപ്പ തുറമുഖത്തിനു സമീപം കടലില്‍ നിന്നാണു ബോട്ടുകള്‍ കസ്റ്റഡിയിലെടുത്തത്. കടലില്‍ പരിശോധന നടത്തുന്നതിനിടെയാണ് ബോട്ടുകള്‍ പിടികൂടിയത്.
കാപ്പാട് പരിക്കണ്ടി പറമ്പില്‍ ശ്യാമപ്രസാദിന്റെ ശ്രീകുറുംബ, പുതിയാപ്പ സ്വദേശികളായ കായക്കലകത്ത് വീട്ടില്‍ കിഷോര്‍കുമാറിന്റെ ശ്രീ പറശ്ശിനി, താഴെപീടികയില്‍ സുബാഷ് ചന്ദ്രബോസിന്റെ നിര്‍മാല്യം, കായക്കലകത്ത് വീട്ടില്‍ പ്രമോദിന്റെ ദീപം, കോതവളപ്പില്‍ ഷൈജുവിന്റെ ബ്ലൂ ഫിന്‍, അരക്കിണര്‍ ബദ്‌രിയ മന്‍സിലില്‍ എം.പി സാദിഖിന്റെ ഗുരുദേവന്‍ എന്നീ ബോട്ടുകളാണ് കസ്റ്റഡിയിലെടുത്തത്.
ബോട്ടുകളിലെ മത്സ്യം 3050 രൂപയ്ക്കു ലേലം ചെയ്തു. ഫിഷറീസ് അസി. ഡയറക്ടര്‍ അബ്ദുല്‍ മജീദ്, എന്‍ഫോഴ്‌സ്‌മെന്റ് എസ്.ഐ എസ്.എസ് സുജിത്, സീനിയര്‍ സിവില്‍ പൊലിസ് ഓഫിസര്‍മാരായ സി. സുബോധ് ലാല്‍, എം.ടി രതീഷ് ബാബു എന്നിവര്‍ നേതൃത്വം നല്‍കി.