കുന്നംകുളം: പട്ടാമ്പി റോഡില്‍ ഓടി കൊണ്ടിരുന്ന കാറിന് തീപിടിച്ചു. ഡ്രൈവര്‍ രക്ഷപെട്ടു. വൈകീട്ട് 3.30 ഓടെ കോമള ബേക്കറിക്ക് സമീപമാണ് അപകടം. അക്കിക്കാവ് ഭാഗത്ത് നിന്ന് വരികയായിരുന്ന മാരുതി ബലാനോ കാറിനാണ് തീ പിടിച്ചത്. കോഴിക്കോട് നരിക്കുനി സ്വദേശി മണാത്ത്് വീട്ടില്‍ അരുണ്‍ഗോപാലകൃഷ്ണന്റെ ഉടമസ്ഥതയിലുള്ള വാഹനം പഴഞ്ഞി സ്വദേശിക്ക് വില്‍പന നടത്തിയിരുന്നു. ഇലക്ട്രിക്കല്‍ ജോലിക്കായാണ് കഴിഞ്ഞ ദിവസം കുന്നംകുളത്തെ വര്‍ക്ക്‌ഷോപ്പില്‍ എല്‍പിച്ചത്. മെയിന്റനന്‍സ് വര്‍ക്കുകള്‍ക്കായി സ്ഥിരമായി വാഹനം കുന്നംകുളത്താണ് നല്‍കാറ്. പട്ടാമ്പി റോഡിലെ കൃഷ്ണ ഗേരേജില്‍ പ്രവര്‍ത്തി തീര്‍ത്ത ശേഷം ടെസ്റ്റ് ഡ്രൈവിന് പോയി മടങ്ങുമ്പോള്‍ തീ ഉയരുന്നത് കണ്ട് വാഹനമോടിച്ചിരുന്ന വര്‍ക്ക് ഷോപ്പ് ജീവനക്കാരന്‍ സജി കാര്‍ വശത്തേക്ക് മാറ്റി നിര്‍ത്തി ഇറങ്ങി ഓടിയതിനാല്‍ അല്‍ഭുതകരമായി രക്ഷപെട്ടു. തീ ആളികത്തിയതോടെ ഇരു ഭാഗത്തു നിന്നുമുള്ള വാഹന ഗതാഗതം പൂര്‍ണമായും തടസപെട്ടു. കുന്നംകുളം ഫയര്‍ ഫോഴ്‌സെത്തിയാണ് തീയണച്ചത്. വാഹനത്തിന്റെ മുന്‍ഭാഗം, എഞ്ചിന്‍ റൂം, അകം എന്നിവ പൂര്‍ണമായും കത്തിനശിച്ചു. അഗ്്‌നി ബാധയെ തുടര്‍ന്ന് അര മണിക്കൂറിലേറെ നേരം മേഖലയിലെ വാഹന ഗതാഗതം സ്തംഭിച്ചു. യന്ത്ര തകരാറാണ് തീ പിടിക്കാന്‍ കാരണമായത്.