ഉരുവച്ചാല്‍: റോഡിലെ ഹമ്പില്‍ സിഗ്‌നല്‍ ഇല്ലാത്തതിനാല്‍ നെല്ലൂന്നിയില്‍ വാഹനാപകടം തുടര്‍കഥയാവുന്നു. അന്തര്‍ സംസ്ഥാന പാതയായ ഇതുവഴി നിദനംപ്രതി ആയിരക്കണക്കിനു വാഹനങ്ങളാണു കടന്നുപോകുന്നത്. അപകടം ഒഴിവാക്കാനായി നിര്‍മിച്ച ഹമ്പിലാണ് സിഗ്‌നല്‍ ഇല്ലാത്തതിനാല്‍ അപകടം വര്‍ധിക്കുന്നത്. അടുത്തെത്തിയാല്‍ മാത്രമേ ഡ്രൈവര്‍മാരുടെ കണ്ണില്‍ ഹമ്പ് ശ്രദ്ധയില്‍പെടൂ. പെട്ടന്നുള്ള ബ്രെയ്ക്കിടലില്‍ പിറകില്‍ നിന്നു വരുന്ന വാഹനങ്ങള്‍ തമ്മിലിടിക്കുകയും നിയന്ത്രണംവിട്ട് മറിയുകയും ചെയ്യുന്നതു പതിവായിട്ടുണ്ട്. റോഡ് പരിചയക്കുറവുള്ള ഡ്രൈവര്‍മാരാണ് അപകടത്തില്‍ പെടുന്നത്. ഇന്നലെ ബൈക്ക് യാത്രികന്‍ ഹമ്പില്‍നിന്നു തെറിച്ചു വീണ് എതിരെവന്ന ലോറിക്കടിയില്‍ പെടാതെ രക്ഷപ്പെട്ടത് തലനാരിഴയ്ക്കാണ്. കഴിഞ്ഞദിവസം പിക്കപ്പ് വാന്‍ മറിഞ്ഞും അപകടമുണ്ടായിരുന്നു. അടിയന്തിരമായി സിഗ്‌നലുകള്‍ സ്ഥാപിക്കണമെന്നാണു നാട്ടുകാരുടെ ആവശ്യം.