മംഗളൂരു: ദക്ഷിണ കന്നഡ എം.പിയും ബി.ജെ.പി നേതാവുമായ നളിന്‍ കുമാര്‍ കട്ടീലിനെതിരേ ജില്ലാ പൊലിസ് മേധാവിക്കും മംഗളൂരു സിറ്റി പൊലിസ് കമ്മിഷണര്‍ക്കും സി.പി.എമ്മിന്റെ പരാതി. സി.പിഎമ്മുകാര്‍ക്കെതിരേ അക്രമത്തിനു ആഹ്വാനം ചെയ്തു കോട്ടയത്തു നടത്തിയ പ്രസംഗത്തിലെ വിവാദ പരാമര്‍ശത്തെ തുടര്‍ന്നാണ് സി.പി.എം ദക്ഷിണ കന്നഡ ജില്ലാ കമ്മിറ്റി പരാതി നല്‍കിയത്.
ബി.ജെ.പി കോട്ടയത്തു സംഘടിപ്പിച്ച പരിപാടിയില്‍ കേരളത്തിലെ സി.പി.എമ്മുകാര്‍ ബി.ജെപി പ്രവര്‍ത്തകരോടു തുടരുന്ന അക്രമം നിര്‍ത്തിയില്ലെങ്കില്‍ കര്‍ണാടകത്തിലെ സി.പി.എമ്മുകാരെ നശിപ്പിക്കാനുള്ള കഴിവു പാര്‍ട്ടിക്കുണ്ടെന്ന അദ്ദേഹത്തിന്റെ പ്രസംഗത്തെ അടിസ്ഥാനമാക്കിയാണു കേസ്.
ഇദ്ദേഹം ഇതിനു മുന്‍പും സി.പി.എമ്മുകാരെ അപകീര്‍ത്തിപ്പെടുത്തുന്ന പ്രസംഗങ്ങളും അഭിപ്രായ പ്രകടനങ്ങളും നടത്തിയിട്ടുണ്ട്. എന്നാല്‍ കോട്ടയത്തു നടത്തിയ പ്രസംഗത്തിലെ പരാമാര്‍ശം ബി.ജെ.പി അക്രമത്തിനു ആഹ്വാനം ചെയ്തിട്ടുള്ളതാണെന്നും പരാതിയില്‍ പറയുന്നു. ഈ പ്രസംഗത്തിന്റെ പേരില്‍ ഏതെങ്കിലും സംഘ്പരിവാര്‍ പ്രവര്‍ത്തകര്‍ സി.പി.എം പ്രവര്‍ത്തകരെ ആക്രമിച്ചാല്‍ അതിന്റെ പൂര്‍ണ ഉത്തരവാദിത്തം ഇദ്ദേഹത്തിനായിരിക്കുമെന്നും പരാതിയില്‍ പറയുന്നു. പരാതിയുടെ അടിസ്ഥാനത്തില്‍ പൊലിസ് കേസെടുത്തു. സി.പി.എം ജില്ലാ ഭാരവാഹികളായ വാസന്ത ആചാരി, ജെ.കെ.ആര്‍ ശ്രയാണ്‍, ജെ ബാലകൃഷ്ണ ഷെട്ടി, കെ യാദവ് ഷെട്ടി, സുനില്‍ കുമാര്‍ ബാജല്‍ എന്നിവരാണ് പൊലിസില്‍ പരാതി നല്‍കാനെത്തിയത്.