ഷൊര്‍ണൂര്‍: ട്രെയിനില്‍ യാത്ര ചെയ്യുന്നതിനിടെ പെരിന്തല്‍മണ്ണ സ്വദേശിയുടെ രണ്ടു ലക്ഷം രൂപ വിലമതിക്കുന്ന ഇലക്ട്രോണിക്‌സ് ഉപകരണങ്ങള്‍ കവര്‍ന്ന കൊല്ലം സ്വദേശിയെ ഷൊര്‍ണൂര്‍ റെയില്‍വെ പൊലിസ് അറസ്റ്റ് ചെയ്തു. കൊല്ലം അമ്പലമുക്ക് അല്‍താഫ് മന്‍സിലില്‍ ഹാഷിം (48) ആണ് പിടിയിലായത്. ഈ മാസം ഒന്‍പതിന് രാജധാനി എക്‌സ്പ്രസില്‍ യാത്ര ചെയ്യുന്നതിനിടെയാണ് പെരിന്തല്‍മണ്ണ സ്വദേശിയുടെ പക്കല്‍ നിന്ന് ലാപ്‌ടോപ്, മൊബൈല്‍ ഫോണ്‍, കാമറ എന്നിവ മോഷണം പോയത്. യാത്രക്കാരന്‍ ഷൊര്‍ണൂര്‍ റെയില്‍വെ പൊലിസില്‍ പരാതി നല്‍കി. ഇതേ തുടര്‍ന്ന് റെയില്‍വെ ഡി.വൈ.എസ്.പി സെയ്താലിയുടെ നേതൃത്വത്തിലുള്ള പൊലിസ് സംഘം നടത്തിയ അന്വേ ഷണത്തിലാണ് ഇന്നലെ രാവിലെ പ്രതിയെ പിടികൂടിയത്. ഇയാളെ പിന്നീട് ഒറ്റപ്പാലം കോടതിയില്‍ ഹാജരാക്കി റിമാന്റ് ചെയ്തു.