കോഴിക്കോട്: കേന്ദ്ര തൊഴില്‍ മന്ത്രാലയത്തിന്റെ കീഴിലുള്ള ദേശീയ തൊഴില്‍ സേവന കേന്ദ്രം വിവിധ സംഘടനകളുമായി ചേര്‍ന്ന് കോഴിക്കോട്ട് മെഗാ തൊഴില്‍മേള സംഘടിപ്പിക്കുന്നു. 28ന് രാവിലെ ഒന്‍പതിനു മലബാര്‍ ക്രിസ്ത്യന്‍ കോളജിലാണ് പരിപാടി. എല്‍ ആന്‍ഡ് ടി, മലബാര്‍ ഗ്രൂപ്പ്, കല്യാണ്‍, ആസ്റ്റര്‍ മിംസ് തുടങ്ങി നൂറോളം സ്വകാര്യ കമ്പനികള്‍ മേളയില്‍ സംബന്ധിക്കുമെന്ന് കേന്ദ്ര തൊഴില്‍ ഉദ്യോഗ മന്ത്രാലയം സബ് റീജനല്‍ എംപ്‌ളോയ്‌മെന്റ് ഓഫിസര്‍ പി.ജി രാമചന്ദ്രന്‍ വാര്‍ത്താസമ്മേളനത്തില്‍ അറിയിച്ചു.
      അഞ്ചാം ക്ലാസ് തുടങ്ങി ബിരുദവും ബിരുദാനന്തര ബിരുദവും ഉള്ള എല്ലാ വിഭാഗക്കാര്‍ക്കും പങ്കെടുക്കാം. മൂവായിരത്തോളം ഒഴിവുകളാണ് നിലവില്‍ റിപ്പോര്‍ട്ടു ചെയ്തിട്ടുള്ളത്.
    താല്‍പര്യമുള്ളവര്‍ അന്ന് രാവിലെ ഒന്‍പതിനു വയസ്, യോഗ്യത, തൊഴില്‍പരിചയം എന്നിവ തെളിയിക്കുന്ന സര്‍ട്ടിഫിക്കറ്റുകളുമായി മേളയിലെത്തി പേര് രജിസ്റ്റര്‍ ചെയ്യണം. രജിസ്ട്രഷനു ഫീസില്ല. ഒരാള്‍ക്ക് നാലു കമ്പനികളുടെ അഭിമുഖത്തില്‍ സംബന്ധിക്കാം.