മാനന്തവാടി: തെരുവുനായയുടെ ആക്രമണത്തില്‍ വിദ്യാര്‍ഥിനിക്ക് ഗുരുതര പരുക്ക്. കല്ലുമൊട്ടന്‍കുന്ന് മഹേഷിന്റെ മകള്‍ പൂജ (11)ക്കാണ് പരുക്കേറ്റത്. കണിയാരം സെന്റ് ജോസഫ്‌സ് ടി.ടി.ഐയിലെ ആറാംക്ലാസ് വിദ്യാര്‍ഥിയാണ് പൂജ.
ഇന്നലെ രാവിലെ ഗ്യാസ് ഏജന്‍സി റോഡില്‍ വച്ചാണ് സംഭവം. മഹേഷിന്റെ കൂടെ സ്‌കൂട്ടറില്‍ യാത്രചെയ്യുന്നതിനിടെയാണ് നായ ആക്രമിച്ചത്. കുട്ടിയുടെ വലതുകാല്‍പാദത്തിന് ഗുരുതര മുറിവേറ്റിട്ടുണ്ട്. തുടര്‍ന്ന് കുട്ടിയെ ജില്ലാശുപത്രിയില്‍ പ്രവേശിപ്പിച്ചു.
ഒരിടവേളക്ക് ശേഷം മാനന്തവാടിയില്‍ നായകളുടെ ആക്രമണം തുടര്‍ക്കഥയാകുകയാണ്. എന്നാല്‍ ആക്രമിക്കുന്നത് വളര്‍ത്തുനായയാണോ തെരുവ് നായയാണോയെന്ന് ഉറപ്പായിട്ടില്ല.
ഇന്നലെ നടന്ന ആക്രമണം നടത്തിയ നായയുടെ കഴുത്തില്‍ ബെല്‍റ്റുള്ളതായി കുട്ടിയുടെ പിതാവ് മഹേഷ് പറഞ്ഞു.
രണ്ട് ദിവസം മുമ്പ് എരുമത്തെരുവ് സ്വദേശി എടത്തില്‍ പുളിക്കണ്ടി ആഷിഖിനും അയല്‍വാസി സല്‍മക്കും നായയുടെ കടിയേറ്റിരുന്നു. സല്‍മയെ നായ ആക്രമിക്കുന്നതുകണ്ട് രക്ഷിക്കാന്‍ ശ്രമിക്കവെയാണ് ആഷിഖിന് കടിയേറ്റത്.
സല്‍മ ചികിത്സ കഴിഞ്ഞ് ആശുപത്രി വിട്ടെങ്കിലും ഗുരുതര മുറിവേറ്റ ആഷിഖ് ഇപ്പോഴും ജില്ലാ ആശുപത്രിയില്‍ ചികിത്സയില്‍ കഴിയുകയാണ്.