കുറ്റിപ്പുറം: അനധികൃതമായി സൂക്ഷിച്ച 20 ലോഡ് മണലും മണല്‍ കടത്താനുപയോഗിച്ച തോണിയും കുറ്റിപ്പുറം പൊലിസ് പിടിച്ചെടുത്തു.
തവനൂര്‍ പഞ്ചായത്തിലെ ആലിന്‍ചുവട് ശ്മശാനത്തിന് സമീപം സൂക്ഷിച്ച മണലാണ് കുറ്റിപ്പുറം എസ്.ഐ നിബുന്‍ ശങ്കറിന്റെ നേതൃത്വത്തില്‍ പിടിച്ചെടുത്തത്. പൊലിസിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ തിരൂര്‍ ഡി.വൈ.എസ്.പി ബാബുവിന്റെ നിര്‍ദേശത്തെ തുടര്‍ന്ന് നടത്തിയ പരിശോധനയിലാണ് തോണിയും മണലും രണ്ട് വാഹനങ്ങളും പിടികൂടിയത്.
മണല്‍ പൊന്നാനി തഹസില്‍ദാറുടെ സാമീപ്യത്തില്‍ കലവറയിലേക്ക് കൈമാറി. പുഴയുടെ മറുകരയില്‍ ഒളിപ്പിച്ച തോണി എസ്.ഐ യും സംഘവും പുയറിലിറങ്ങി കരക്കെത്തിച്ച് നശിപ്പിച്ചു. മണല്‍ കടത്തിയ വാഹനം ഓടിച്ചയാളെ തിരിച്ചറിഞ്ഞിട്ടുണ്ടെന്നും ആര്‍.സി ഉടമക്കും ഡ്രൈവര്‍ക്കുമെതിരേ കേസെടുക്കുമെന്നും എസ്.ഐ പറഞ്ഞു. പ്രദേശത്ത് പൊലിസ് കാവല്‍ ഏര്‍പ്പെടുത്തി.